Владимир Сивцев: «Кыайыыны чугаһатар үлэ салҕана турар»

Дойдуга 2022 сыл балаҕан ыйын 21 күнүгэр биллэриллибит быстах хомуур саҕаланаатын кытта СӨ тырааныспарга уонна суол хаһаайыстыбатыгар миниистиэристибэтин иһинэн суһал ыстаап тэриллибитэ. Ыстаап өрөспүүбүлүкэ үрдүнэн бу эйгэҕэ үлэлии олорор араас тэрилтэлэр олохтоох салайыныы уонна ситэриилээх былаас уорганнарын, байыаннай комиссариаты уо.д.а. кытта хардарыта бииргэ үлэлээһиннэрин сүрүннүү олорорун, туох үлэлэр ыытылла туралларын туһунан миниистир Владимир Сивцев кэпсээтэ.

— 2022 сыл балаҕан ыйын 21 күнүттэн алтынньы 15 күнүгэр диэри министиэристибэ  суһал ыстаабын хонтуруоллааһынынан үлэһиттэр төгүрүк суукка дьуһуурустубалара тэриллэн үлэлээбитэ. Ол курдук, ыстаап көмөтүнэн быстах ыҥырыынан уонна тус баҕанан байыаннай дьайыыларга кытта барааччылар айаннарын тэрийии хааччыллыбыта.  Ол курдук, нэһилиэнньэлээх пууннартан барар дьону эрэгийиэн сборнай пуунугар диэри тырааныспар араас көрүҥүнэн тиэрдиигэ; быстах ыҥырыынан уонна тус баҕанан байыаннай дьайыыларга кытта барааччылары өрөспүүбүлүкэ тас өттүгэр, ол иһигэр, Дьокуускайтан, Нерюнгриттан, Мииринэйтэн, айанныылларын хааччыйыыга; улуустартан Дьокуускайга көтөр билиэттэри уурдарыыга (бронь); ыраах сытар суола суох нэһилиэктэртэн улуус киинигэр таһар рейстэри тэрийиигэ; өрөспүүбүлүкэ тас өттүгэр баар сборнай пууннарга таһар чартер рейстэрин тэрийиигэ, онно миэстэлэри уурдарыыга (бронь); быстах ыҥырыынан уонна тус баҕанан байыаннай дьайыыларга кытта барааччылар айаннаан иһэр массыыналарын Бүлүү, Өлүөнэ өрүстэргэ паромнарынан босхо туоратыыны тэрийиигэ; кыра эбэтэр салгынынан үрдэриллибит “сыттыктарынан” айанныыр суудуналарынан өрүстэри босхо туоратыыны тэрийиигэ; нэһилиэнньэлээх пууннартан аэропортарга Хонтуруоллаан аһардар пууннарга диэри тиэрдэр автобустарынан хааччыйыыга уонна олору арыаллааһыны тэрийиигэ.
СӨ тырааныспарга уонна суол хаһаайыстыбатыгар миниистирин тус салалтатынан итиэннэ министиэристибэ анаабыт мобилизационнай үлэһитин сүрүннээһининэн министиэристибэҕэ сыһыарыллыбыт Үөһээ Бүлүү улууһун быстах ыҥырыынан байыаннай эпэрээссийэҕэ барар дьонун байыаннай усулуобуйаҕа эппиэттиир таҥаһынан-сабынан, малынан толору хааччыйыы тэриллибитэ. Министиэристибэ гуманитарнай таһаҕаһы, быстах ыҥырыынан, баҕа санаанан байыаннай эпэрээссийэҕэ барар дьоҥҥо аналлаах таһаҕастары таһыыны-тиэйиини, тиэрдиини бастайааннай төрүккэ хааччыйар үлэни ыыта олорор. 2022 сыл балаҕан ыйыттан 7,5 туонна кэриҥэ маннык таһаҕас босхо тиэрдилиннэ. Российскай Федерация Оборуонаҕа министиэристибэтин сайаапкатынан өрөспүүбүлүкэҕэ диэри, онтон нэһилиэктэргэ диэри «груз 200» тиэрдии бастайааннай төрүккэ сүрүннэнэ турар, ааспыт ыам ыйыттан маннык 24 таһаҕаһы тиэрдиигэ көмө оҥоһуллунна. Маны таһынан быстах ыҥырыынан, баҕа санаанан байыаннай эпэрээссийэҕэ сылдьар дьон оҕолоро өрөспүүбүлүкэ тас өттүгэр чэбдигирдэр кииннэргэ сынньана барыылара тыраанспар өттүнэн хааччыйыллар.
Министиэристибэ Самоходнай массыыналар уонна онтон да атын тиэхиньикэ көрүҥнэрин тиэхиньиичэскэй туруктарын судаарыстыбаннай көрүүгэ департаменын салайааччыта Е.В. Тимофеев быстах ыҥырыыга РФ сэбилэниилээх күүстэрин аармыйатыгар ыҥырыллан барбыта. Бүгүҥҥү туругунан кини мотострелковай биригээдэ састаабыгар Херсон уобалаһыгар байыаннай эпэрээссийэҕэ сылдьар. Быстах ыҥырыы саҕаламмытын кэннэ өрөспүүбүлүкэ тырааныспарын эйгэтин предприятиеларын, үлэһиттэрин быстах ыҥырыыга ыҥырыллыбат, саппааска сылдьар тэрилтэлэр уонна гражданнар испииһэктэригэр киллэрии үлэтэ ыытыллыбыта.
Дьон тырааныспар, айан-сырыы өттүгэр уонна, ол иһигэр, байыаннайдар дьиэ кэргэттэригэр судаарыстыбаттан көмөлөһүүгэ “122 нүөмэринэн” киирэр ыйытыыларга тутатына суһаллык хоруйдааһын, быһаарыы оҥоһуллар. Тырааныспар комплексын тэрилтэлэриттэн байыаннай эпэрээссийэни өйөөһүҥҥэ 6,4 мөл солкуобайтан тахса суумалаах көмө оҥоһулунна. Маны сэргэ министиэристибэ үлэһиттэрин биир күннээҕи хамнастарыттан Донбасс олохтоохторугар үбүнэн көмө оҥоһулунна. Российскай Федерация Сэбилэниилээх күүстэригэр Донбаһы өйүүр Пуондаҕа 9 автотранспорт көмөҕө бэриллибитэ. Онон кыайыыга эрэллээх, кыайыыны чугаһар маннык үлэ салҕана турар.