Владимир Путин саха хорсун буойуттарыгар Арассыыйа Дьоруойа үрдүк наҕараадалары туттарда (ВИДЕО)

Запорожье туһаайыытынан Украина Сэбилэниилээх күүстэрин колоннатын соҕотоҕун урусхаллаабыт «Алеша» тааҥка экипаһын хорсун быһыытын туһунан бары даҕаны иһиттэххит буолуо.

Бэҕэһээ дойду бэрэсидьиэнэ Владимир Путин Курскайдааҕы кыргыһыыга кыайыы 80 сылыгар аналлаах кэнсиэр кэмигэр, Украинаҕа байыаннай эпэрээссийэ кыттыылаахтарыгар судаарыстыбаннай наҕараадалары туттарда. Кинилэр кэккэлэригэр икки саха уола – Филипп Евсеев (Сунтаар) уонна Алексей Неустроев (Уус Алдан) үрдүк наҕарааданы иилинэр чиэстэннилэр. Саха хорсун буойуттарын сэргэ лейтенаннар Александр Леваков, Расим Баксиков Арассыыйа Дьоруойа буоллулар, ефрейтор Илья Гавриловка “Хорсунун иһин” мэтээли туттарда.

“Бүгүн манна Курскай сиригэр судаарыстыбаннай наҕарааданы тутар биһиги дьоруойдарбыт, байыаннай сулууспалаахтарбыт, байыаннай эпэрээссийэ кыттыылаахтарын хорсун быһыылара, 1943 сыл сайын өстөөхтөрү кытта Курскай кыргыһыы дьоруойдарын албан ааттарыгар тэҥнээх”, — диэн бэрэсидьиэн эттэ.

Саха хорсун Дьоруойдарын туһунан Саха сирэ.ру суруйууларын бу сигэнэн ааҕыҥ.