Владислав Окороков: «Миэхэ үөрүү-көтүү, өрө көтөҕүллүү санаата киирэр»

Аҕыйах чааһынан Арассыыйа Бэрэсидьиэнэ Владимир Путин солотугар киирэр сиэрэ-туома ыытыллыа. Инаугурация Москва бириэмэтинэн 12:00 чаастан саҕаланыаҕа уонна чаас курдук барыаҕа. Ону федеральнай ханааллар: Бастакы ханаал, «Россия 1», НТВ, о.д.а. быһа эпииргэ көрдөрүөхтэрэ.

Дойду бүгүҥҥү ураты бэлиэ тэрээһинин иннинэ СӨ Уопсастыбаннай балаататын чилиэнэ, Абый улууһун Н.Н.Ефимов аатынан Үрүҥ Хайа гимназиятын дириэктэрэ Владислав Окороков бэйэтин санаатын үллэһиннэ:

— Бүгүн дойду үрдүнэн улахан суолталаах бэлиэ күн буолар. Арассыыйа Бэрэсидьиэнэ Владимир Путин солотугар киирэр сиэрэ-туома – бу биһиги судаарыстыбабыт историятыгар саҥа лииһи арыйар.
Миэхэ үөрүү-көтүү, өрө көтөҕүллүү санаата киирэр. Биһиги бары дьэҥкир, чиэһинэй быыбар ааспытын билэбит, демократическай процесс туоһутунан буоллубут. Куоластааһын түмүгэ көрдөрбүтүнэн, Арассыыйа норуотун үгүс өттө Владимир Владимирович Путиҥҥа итэҕэйэрин уонна дойду инники сайдыытын киниэхэ эрэнэрин көдөрөр.
Үөрэхтээһин мэлдьи буоларын курдук, судаарыстыбаннай бэлиитикэ биир сүрүн соругунан буолара. Мин гимназия дириэктэрэ буоларым быһыытынан, бу кэлэр алта сылга үөрэхтээһин систиэмэтэ сайдарыгар өссө улахан болҕомто ууруллуо диэн эрэнэбин. Ону кытта национальнай бырайаыктар олоххо киириэхтэрэ, үөрэх хаачыстыбата үрдүө, оскуола инфраструктурата сайдыа, талаанаах ыччат өйөбүллээх буолуо.
Владимир Владимирович Путин салалтатынан биһиги оҕолорбут дьоһун үөрэҕи ылан, кыахтарын арыйалларыгар сөптөөх усулуобуйа тэриллиэҕэ диэн эрэнэбин.
Арассыыйа бүгүн ис да, тас да өттүттэн үгүс дьайыылары көрсөр. Ол гынан баран, биһиги Бэрэсидьиэммит муударай өйө, уопута уонна быһаарыылаах дьаһала ханнык да ыарахаттары туораан, дойдубут сайдарыгар көмөлөһүө диэн эрэнэбин. Биһиги бары лиидэрбит тула түмсэн, күүстээх, тутулуга суох уонна чэчирии сайдар Арассыыйаны тутарга бэйэбит кылааппытын киллэриэхтээхпит.