Владивостокка аччыгый куораттары тупсарыы пуорума саҕаланна

Бүгүн Владивостокка аччыгый куораттар уонна историческэй сэлиэнньэлэр «Аччыгый куорат: дойду улахан тирэҕэ» диэн пуорум үлэтин саҕалаата.

Тэрээһиҥҥэ РФ Бырабыыталыстыбатын бэрэссэдээтэлэ Михаил Мишустин кыттыыны ылыаҕа.  Пуорум сүрүн соруга — куорат эйгэтин тупсарыыга бастыҥ бырайыакка VIII Арассыыйатааҕы куонкурус түмүгүн таһаарыы. Ол иһигэр Уһук Илин уокуругун эрэгийиэннэрин II куонкуруһун түмүгэ тахсыаҕа. Бу туһунан СӨ Аҕа баһылыгын иһинэн үлэлиир архитектура управлениета иһитиннэрдэ.

Саха сирэ куорат эйгэтин тупсарыыга   VIII Арассыыйатааҕы куонкуруска 14  сайаапканы ыыппыта. Онно бааллар:

— В.И. Ленин аатынан болуоссат  — Алдан к.;
— Экологтар искибиэрдэрэ —  Сунтаар с. (2 этаап);

— «Кыайыы Аартыга» уопсастыбаннай сир — Майа с.;

— Доҕордоһуу болуоссата — Нам с.;
—  Успуордунан дьарыктаныы уонна көхтөөх сынньалаҥ зоната — Чульман б.;
— Күөл биэрэгэр сынньалаҥ зоната —  Ытык Күөл с.;
—  «Дьикти саас» искибиэр —  Чурапчы с.;
— «Тэтим» мини-паарка — Амма с.;
—  «Ыллыыр кумах» сынньанар зона — Бүлүү к.;
— Кыайыы болуоссата — Орто Халыма к.;
— Сынньалаҥ биэрэгэ — Хандыга б.;
— «Ойуур» паарка — Ленскэй к. (2 этаап);
— Куорат паарката — Мииринэй к.;
— Култуура паарката — Нерюнгри к.

Владивостокка ыытылла турар пуорумҥа Саха сирин дэлэгээссийэтэ кыттар. Куонкурус түмүгэ бүгүн киэһэ тахсыаҕа.