Владивостокка “Арассыыйа айар эйгэтин нэдиэлэтэ – Уһук Илин” диэн пуорум буолуоҕа

Владивосток куоракка ыам ыйын 25-27 күннэригэр “Арассыыйа айар эйгэтин нэдиэлэтэ – Уһук Илин” («Российская креативная неделя – Дальний Восток») пуорумҥа кыттыан баҕалаахтары суруттарарга тэрийээччилэр «Креативнай экэниэмикэ» АНО уонна РФ Уһук Илини уонна Аартыканы сайыннарыыга министиэристибэтэ ыҥырыы таһаардылар.

Сыала-соруга – бэйэ толкуйунан, айар дьоҕурунан, сатабылынан бородууксуйаны оҥоруу индустриятын дойду үрдүнэн сайыннарыы, уопуту атастаһыы, бу хайысхаҕа дойду экэниэмикэтин, билимин, технологическай кыахтарын туһулааһын буолар.
Пуорум биэс былаһаакканан «Океан» киинэтыйаатырга ыытыллыа. Маны сэргэ анал бырайыактар уонна култуура тэрээһиннэрэ куорат атын да миэстэлэригэр тэриллиэхтэрэ. Пуорум чэрчитинэн манна дойду уонна эрэгийиэн таһымнаах креативнай диэн ааттанар эйгэтигэр үлэлиир урбаан тэрилтэлэрэ түмсэн биисинэстэрин уопутун атастаһыахтара.
Пуорум сүрүн хайысхата – бэйэ толкуйунан, айар дьоҕурунан бородууксуйаны, табаары оҥорон таһаарыы уонна сайдыы илиҥҥи тускулун тутуһуу.

РФ Уһук Илини уонна Аартыканы сайыннарыыга миниистирэ Алексей Чекунков: ”Пуорум соруга – айар көхтөөх, талааннаах дьулуурдаах дьоммутугар кинилэр айар кыахтарын олоххо киллэриилэригэр көмөлөһүү, кэскиллээх бырайыактарга болҕомтону туһаайыы, кинилэр кыаҕырыыларыгар тирэх буолуу, билигин бара турар саҥа гуманитарнай хамсааһыны уонна айар эйгэ араас хайысхаларыгар эбии кыахтары үөскэтиини уонна Илин диэки хайыһыыны күүһүрдүү”.

Бырагыраама аан дойду, Арассыыйа уонна Уһук Илин таһымнаах бэбиэскэнэн ыытыллыа. Тэрийээччилэр ортолоругар Арассыыйатааҕы кинигэ сойууһа, Култуура көҕүлээһиннэригэр Бэрэсидьиэн пуондата бааллар.