Владивостокка күөн күрэскэ Саха сириттэн алта дьиэ кэргэн кыттар

Владивостокка «Это у нас семейное» күөн күрэс уокуруктааҕы полуфинала саҕаланна. Манна Уһук Илин уокуругуттан дьиэ кэргэттэр хамаанданан кытталлар. Дьиэ кэргэн сылынан ыытыллар күрэс ыам ыйын 12 күнүгэр түмүктэнэр.

Бүгүн, ыам ыйын 11 күнүгэр, Владивостокка Русскай арыыга тэрээһини арыйыы сиэрэ-туома ыытылынна. Манна Саха сириттэн 31 киһилээх алта дьиэ кэргэн кыттар.

«Саха сириттэн кыттааччыларга күөн күрэс үтүөнү, сырдык өйдөбүлү бэлэхтииригэр, элбэх дьону кытары билсэллэригэр, сүрүнэ — дьиэ кэргэттэрэ өссө бөҕөргүүрүгэр эрэнэбин», — диэн этэр Саха сирин Ил Дархана Айсен Николаев.

«Арассыыйа 11 субъегыттан 70  хамаанда түмүстэ. Кинилэр финалга тахсар иһин күрэстэһэллэр. Оттон күөн күрэскэ кыттарга уопсайа биэс тыһыынча кэриҥэ дьиэ кэргэн сайаапкаламмыта. Полуфиналга киирбит хамаандалар ортолоругар удьуор табаһыттар, педагогтар, байыаннай сулууспалаахтар, ону сэргэ,  полицейскайдар, музыканнар, предпринимателлэр, быраастар бааллар«, — диэн «Россия – страна возможностей» АНО генеральнай дириэктэрэ, Президентскэй академия ректора Алексей Комиссаров этэр.

Күөн күрэс кыттыылаахтарыгар «Россия – страна возможностей» АНО генеральнай дириэктэрин солбуйааччы Оксана Ачкасова уонна Владивосток куорат баһылыга Константин Шестаков эҕэрдэлэрин тиэртилэр.

«Дьиэ кэргэн сылыгар бу күрэхтэһиигэ кыттар улахан чиэс-бочуот. Манна 70 хамаанда түмүстэ. Финалга федеральнай уокуругу ким көмүскүүрэ манна биллиэҕэ. Владивосток ыалдьытымсаҕа күрэстэһээччилэргэ тирэх буолуо, көмөлөһүө«, — диэн Константин Шестаков санаатын үллэһиннэ.

Бу күн былаһааккаҕа айар, спортивнай, интеллектуальнай сорудахтары толоруу саҕаланна. Дьиэ кэргэн соруга — хас биирдии кыттааччы билиитин, сатабылын көрдөрөрүн таһынан, бэйэ-бэйэлэрин кытта өйдөһөллөрүн көрдөрүөхтээхтэр.

Күрэс кыттааччыларын билиини-көрүүнү биэрэр лиэксийэлэр, маастар-кылаастар, аһаҕас кэпсэтиилэр, экскурсиялар, спортивнай оонньуулар күүтэллэр.

Сарсын, ыам ыйын 12 күнүгэр, кыайыылаахтар ааттара биллиэҕэ.

Сиһилии https://www.sakha.gov.ru/news/front/view/id/3398468  манна ааҕыахха сөп.

СӨ Ил Дарханын уонна СӨ Бырабыыталыстыбатын пресс-сулууспата