«Вместе мы сила» түмсүү байыаннай дьайыыга уочараттаах көмөтүн ыытта

Амарах дууһалаах, үтүө санаалаах Саха сирин олохтоохторо түмсэн байыаннай дьайыыга сылдьар биир дойдулаахтарбытыгар көмөлөһөллөр. Бу күннэргэ «Вместе мы сила» түмсүү волонтердара көҕүлээһиннэринэн иккитэ аахсыйа ыытыллан, байыаннай госпиталларга сытар уонна инники кирбиигэ сылдьар уолаттарга гуманитарнай көмө хомулунна.

Ыҥырыы тахсаатын «Родные и близкие бойцов СВО» социальнай ситим бөлөҕүн чилиэннэрэ 58000 солкуобай суумалаах үбү хомуйдулар. Бу үбүнэн «Вместе мы сила» түмсүү волонтердара суорҕаннары, сыттыктары, сабыылары, таҥаһы-сабы, наскылары, соттордору, ону тэҥэ баттыктары уонна торуоскалары атыыластылар. Бу хомуллубут көмө бүгүн  байыаннай дьайыы зонатыгар айанныаҕа. Волонтердар бэҕэһээ киэһэ хойукка диэри, бүгүн сарсыарда эрдэттэн ыстааптарыгар кэлэн көмөнү наардаан, суулаан, хас даҕаны баулга уонна дьааһыкка уган бэлэмнээтилэр. Ол кэннэ эбиэккэ анал байыаннай дьайыы зонатыгар барар массыынаҕа илдьэн туттардылар.

«Бааһынай ырыынак» урбаанньыттарын кытта бииргэ үлэлээһин эмиэ улахан суолталаах буолла. «Вместе мы сила» волонтердар түмсүүлэрэ фроҥҥа наадалаах 200-тэн тахса киилэ таһаҕаһы хомуйан бэлэмнээтэ. Олохтоох урбаанньыттар ыарахан түгэҥҥэ көмөлөрүн ууннулар. Оттон Аллайыаха улууһун Чкалов сэлиэнньэтин олохтоохторо 30 устуука халыҥ наскыны баайан ыыппыттар.

Итини таһынан, «Вместе мы сила» түмсүү байыастарга анал таҥаһы-сабы тигиинэн дьарыктанар: «Ойуур» диэн разведчиктар көстүүмнэрин, «Люгер» — дронтан хаххалыыр былаас-суорҕаннарын уонна «Чокур» пончо-былаастарын тигэн уолаттарга ыыттылар.

Хамсааһын тэрийээччитэ Римма Бережнева бэлиэтээбитинэн, хайа да көмө улахан суолталаах. «Биһиги аахсыйабытын ылынан көмөлөспүт дьоммутугар махталбытын тиэрдэбит. Биир сыаллаах-соруктаах дьон уонна волонтердар күүстэрин түмэн, байыастарбытыгар көмөлөһөрбүт, кыайыыны тыылга уһансарбыт биһиги ытык иэспит», — диэн Римма Бережнева махталын этэр.