“Водоканал” Дьокуускай куорат “Сулустаах” түөлбэтигэр уу саҥа ситимин тардыаҕа

Дьокуускай куорат “Сулустаах” тутулла турар түөлбэни сайыннарыы Ил Дархан Айсен Николаев “Водоканал” АУо генеральнай дириэктэрэ Анатолий Кырджагасовы кытта оробуочай көрсүһүүтүн биир сүрүн тиэмэтинэн буолла.   

Анатолий Кырджагасов иһитиннэрбитинэн, балаҕан ыйын 1 күнүгэр уу саҥа ситимин тутуу сүрүн үлэтэ түмүктэниэхтээх. Эбийиэк үлэҕэ киириитин аактата балаҕан ыйын 20 күнүгэр диэри баттанара былааннанар.

Хампаанньа генеральнай дириэктэрэ этэринэн, күн бүгүн кыбартаал ханаалын үлэтин 97% бүппүт, 2,15 км напорнай канализация уонна үс канализационнай насос ыстаансыйата тутуллубут.

“Бу эбийиэктэри үлэҕэ киллэрии, биллэн турар, тустаах түөлбэ инженернэй инфраструктуратын тупсарыаҕа. Эбийиэктэр ыйыллыбыт болдьохторугар үлэҕэ киирэллэрин хааччыйар ирдэнэр” – диэн Айсен Николаев эттэ.

Итини сэргэ, кэпсэтии оттук кэмигэр бэлэмнэнии уонна сууйуу, ыраастааһын тула барда. Анатолий Кырджагасов иһитиннэрэринэн, атырдьах ыйын 25 күнүгэр диэри ситими сууйуу, ыраастааһын түмүктэниэҕэ. Барыта 115 км уунан хааччыйар, 18 ыраас уу иһитин (емкость), 33 км канализация ситимин, 40 канализационнай насоснай ыстаансыйаны ыраастыыр былааннанар.

Ил Дархан уонна Бырабыыталыстыба пресс-сулууспата суруйар.