Военкоматка көспүтүн туһунан иһитиннэрбэтэхтэри ыстарааптыыр буолуохтара

Военкоматка көспүтүн туһунан биллэрбэтэх уолаттары 10-тан 20 тыһыынча солкуобайга диэри ыстарааптыыр буолуохтара.

Бу туһунан сокуон барылын Госдуума дьокутааттара бэс ыйын 24 күнүгэр иккис уонна үһүс ааҕыыга ылыннылар. Уларытыылар РФ Административнай быраабы кэһиилэр туһунан Кодексатын 21.5 ыстатыйатыгар киириэхтэрэ.

Үс ыйтан ордук болдьоххо саҥа сиргэ көспүтүн туһунан байыаннай комиссариатка биллэрбэтэх гражданиҥҥа 10-тан 20 тыһыынчаҕа диэри солкуобай кээмэйдээх ыстараап олохтонуо.

Ону таһынан,  байыаннай эбээһинэстээх гражданин саҥа сиргэ көспүт түгэнигэр, федеральнай сокуонунан олохтоммут болдьоҕунан байыаннай комиссариатка кэлбэтэҕин иһин 20 тыһыынчаҕа солкуобайга диэри кээмэйдээх суумаҕа ыстарааптанар.

«Военкоматтарга кэнники кэмҥэ диэри электроннай дааннайдар баазалара суоҕа. Саҥа ыҥырыллааччылар туһунан сибидиэнньэлэр кумааҕы карточкаларга суруллан хараллаллара. Онон байыаннай сулууспаҕа сааскы-күһүҥҥү ыҥырыыттан куотунарга аҕыйах ый устата уолаттар атын аадырыстарынан «саһан» сыталлара, сорохтор мэдииссинэ докумуоннарын атыылаһан ылаллара», — диэн Оборуона кэмитиэтин бэрэссэдээтэлин бастакы солбуйааччыта Алексей Журавлев суруналыыстарга быһаарда.