Военкомакка көспүтүҥ туһунан иһитиннэрбэтэххинэ ыстарааптаныаҥ

РФ Бэрэсидьиэнэ Владимир Путин Административнай кэһиилэр тустарынан кодексатыгар уларытыылары киллэрэр уонна байыаннай комиссариакка көспүтүҥ туһунан иһитиннэрбэтэх иһин ыстараап анааһын бэрээдэгин чуолкайдыыр сокуону бигэргэттэ. Саҥа быраабылаларынан, итинник кэһии иһин эппиэтинэс аармыйаҕа ыҥырыы кэмигэр эрэ буолбакка, сыл устата туһаныллыаҕа. Бу туһунан ТАСС суруйар.

Билигин олорор сиртэн үс ыйтан ордук кэмҥэ көспүтүҥ туһунан военкомакка сыл ханнык баҕарар кэмигэр иһитиннэрбэтэххэ, 10 тыһыынчаттан 20 тыһыынча солкуобайга диэри кээмэйдээх административнай ыстараап көрүллэр.

Сокуон көҕүлээһинин ааптардарынан Оборуонаҕа кэмитиэтин бэрэссэдээтэлэ Андрей Картаполов салайааччылаах Судаарыстыбаннай Дуума  дьокутааттарын бөлөҕө буолар. Ылыныллыбыт уонна илии баттаммыт сокуон нуормалара аармыйаҕа ыҥырыы туһунан урут бигэргэтиллибит сокуону кытта сөп түбэһиннэрилиннэ.