«ВОИН» киин курсааннара Бүтүн Арассыыйатааҕы байыаннай-тактическай күрэхтэһиилэргэ кыттыахтара

Сүүмэрдиир түһүмэх атырдьах ыйын 29-31 күннэригэр Волгоград уобалаһыгар «Авангард»  лааҕыр баазатыгар ыытыллыаҕа. Онно 21 эрэгийиэнтэн 250 курсаан кыттыаҕа.

Финалга түөрт эрэ хамаанда тахсыаҕа, ол балаҕан ыйын 15-21 күннэригэр Дьокуускай куоракка буолуоҕа. «Путь ВОИНа» Бүтүн Арассыыйатааҕы байыаннай-тактическай күрэхтэһиилэрэ РФ Бэрэсидьиэнин Уһук Илин федеральнай уокуруктааҕы боломуочуйалаах бэрэстэбиитэлэ, «ВОИН» киин кэтээн көрөр сэбиэтин бэрэссэдээтэлэ Юрий Трутнев сорудаҕынан аан бастаан тэриллэллэр.

Күрэхтэһии киин курсааннара ылбыт билиилэрин практикаҕа чиҥэтэр уонна бэлэмнэнии систиэмэтин тупсарар сыаллаах.

«„Путь ВОИНа“ – „ВОИН“ киин бэйэтин улахан бырайыага. Бу аан бастаан тэриллэр уонна биһиги курсааннарбытыгар саамай бөдөҥ күрэхтэһиилэртэн биирдэстэрэ буолуоҕа. Бырагыраама стратегическай уонна тактическай толкуйу сайыннарарга оҥоһуллубута, оҕолор успуорт, хамаанданан үлэ нөҥүө инникитин туһалыыр дьоҕурдары ылаллара улахан суолталаах», – диэн РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ, «ВОИН» киин кэтээн көрөр сэбиэтин бэрэссэдээтэлэ Юрий Трутнев эттэ.

Сүүмэрдиир түһүмэххэ курсааннар хамаандалара 9 тургутууну ааһыахтара. «Маннык күрэхтэһиилэр нөҥүө ыччат ураты патриотическай тыына үөскүүр, майгыта-сигилитэ бөҕөргүүр. Манна хамаанданан үлэ, лидер буолуу, уустук быһыыга-майгыга быһаарыныыны ылынар уонна ону толорууга эппиэтинэһи сүгэр дьоҕур улахан суолталаах. Күрэхтэһиилэр биһиги үүнэр көлүөнэбитигэр интэриэһинэй уонна туһалаах буолуохтара диэн эрэнэбин. Сыл аайы ыытар буолуохпут», – диэн «ВОИН» киин хамандыыра, Арассыыйа Дьоруойа уонна «Дьоруойдар кэмнэрэ» бэрэсидьиэн бырагырааматын кыттыылааҕа Андраник Гаспарян эттэ.

Күрэхтэһии бырагырааматын чэрчитинэн курсааннар Арассыыйа Дьоруойдарын, байыаннай  дьайыы кыттыылаахтарын, Олимпийскай чөмпүйүөннэри  уонна да атын аатырбыт күрэсчиттэри кытта көрсүөхтэрэ. Аҕа дойду Улуу сэриитигэр сэбиэскэй норуот хорсун быһыытын туһунан өйдөбүлү харыстыыр Сталинград сирин бэлиэ сирдэригэр сылдьыы тэриллиэҕэ: «Мамаев Кургаҥҥа Сталинград кыргыһыытын дьоруойдарыгар» мемориальнай комплекс, «Сталинград кыргыһыыта» панорама-түмэл. Дьоруойдар болуоссаттарыгар миитиҥҥэ кыттыахтара, Байыаннай Албан аат саалатыгар сибэкки ууруохтара.

«ВОИН» киин РФ Бэрэсидьиэнэ Владимир Путин сорудаҕынан тэриллибитэ. Киин филиаллара дойду 21 эрэгийиэнигэр үлэлииллэр. Уһук Илиҥҥэ эрэгийиэннээҕи салаалара Хабаровскай кыраайга, Бурятия Өрөспүүбүлүкэтигэр, Сахалин уобалаһыгар, Камчатка кыраайыгар, Саха Өрөспүүбүлүкэтигэр арылыннылар.

«ВОИН» филиаллара 400-кэ инструкторы түмэллэр, ол иһигэр Арассыыйа бойобуой снайпинын Федерациятын исписэлиистэрэ, кинилэртэн үгүстэрэ  байыаннай дьайыы кыттыылаахтара буолаллар. Кинилэр 14 саастаах ыччаттарга уотунан, инженернэй уонна тактическай бэлэмнэнии, сибээһи тэрийии, национальнай куттал суох буолуутун олоҕо, пилота суох көтөр аппараттары салайыы, тактическай мэдиссиинэ олоҕо, байыаннай-успуорт оонньуулар курдук дисциплиинэлэргэ дьарыктары ыыталлар. Икки сыл иһигэр араас хайысхаларынан 55 тыһ. тахса курсаан үөрэннэ.