«ВОИН» киин пилота суох тиһиги сүрүннүүр уонна туһанар киини тэрийдэ

«ВОИН» кииҥҥэ пилота суох технологиялар эйгэтигэр исписэлиистэр үлэлэрин-хамнастарын түмэр уонна сүрүннүүр киин тэрилиннэ.

Кинилэр саҥа көрүҥнэри тургутарга, оҥорон таһаарыыга, ол иһигэр бырагырааманан хааччыйыыга, бырагыраамалары уонна методичкалары суруйууну былаанныыллар.

«„ВОИН“ киин бастакы байыаннай тиһиги сөргүтэр. РФ Бэрэсидьиэнин сорудаҕынан киин дойдубутун күүстээх оҥорор сыалтан тэриллибитэ. Пилота суох көтөр аппарааттар экэниэмикэ араас салааларыгар, ол иһигэр тыа хаһаайыстыбатыгар, таһаҕаһы тиэрдиигэ уонна логистикаҕа, экологическай кэтэбилгэ, ону таһынан байыаннай дьайыыны ыытарга киэҥник туттуллаллар: разведкаҕа, сыалы ыйарга, сиринээҕи уонна байҕалынан сыалларга уоту аһарга.

Саҥа технологияларга үөрэтии – киин биир соруга буолар. Ол туһугар инструктордар квалификацияларын таһыма үрдэтиллэр, араас бырагыраамалар оҥоһуллаллар, үөрэнээччилэр бэлэмнэрин таһыма үрдэтиллэр», – диэн РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, «ВОИН» киин Кэтээн көрөр Сэбиэтин бэрэссэдээтэлэ Юрий Трутнев эттэ.

«ВОИН» кииҥҥэ пилота суох аппарааттары салайыыга уонна кинилэри утары охсуһууга үөрэх 2023 сылтан ыытыллар. Бу кэм иһигэр бырагырааманы Арассыыйа 21 эрэгийиэнигэр 95 тыһыынчаттан тахса курсаан, 8,5 тыһыынчаттан тахса оскуола учуутала баһылаата.

«„ВОИН“ киин Дьокуускайдааҕы филиалыгар пилота суох көтөр аппарааттар оператордарын үөрэтии биһиги үлэбит уопсай бырагырааматын чэрчитинэн барар. Филиалга курсааннары пилота суох аппарааттары салайарга үөрэтэргэ үчүгэй материальнай бааза тэриллибит. Байыаннай дьайыы зонатыгар дроннары салайыыга уопуттаах  икки инструктор бу күннэргэ Волгоград куоракка квалификацияны үрдэтинэр куурустары аастылар уонна пилота суох технологиялар эйгэлэригэр исписэлиистэр үлэлэрин-хамнастарын түмэр уонна сүрүннүүр киин үлэтигэр кыттыһарга бэлэмнэр», – диэн бэлиэтээтэ «ВОИН» Дьокуускайдааҕы киин инструктора, «Саха сирэ – Дьоруойдар сирдэрэ» каадыр бырагырааматын кыттыылааҕа, анал байыаннай дьайыы бэтэрээнэ Максим Иванов. Сиһилии манна аах.