Вокзалга эмискэ ырыа дьиэрэйдэ…

Аҕа дойду көмүскээччилэрин күнүн көрсө Д.К. Сивцев-Суорун Омоллоон аатынан Опера, балет судаарыстыбаннай тыйаатырын солистара Аллараа Бэстээххэ тимир суол вокзалыгар тиийэн, ырыа бэлэхтээтилэр.

Опера ырыаһыттара аатырбыт «Катюша» ырыаны айанньыттарга бэлэхтээтилэр, күүстээх аҥаардары эҕэрдэлээтилэр.

Пуойастарын кэтэһэ олорор пассажирдар эмискэ ырыа дьиэрэйбитигэр, олус соһуйдулар, үөрдүлэр. Вокзал дьиэтин акустиката бэртээхэй буолан, биллэр-көстөр ырыаһыттар көмүс куоластара хас да буолан, хаттыгастанан, араас дэгэтин оонньотон, кыырайа көттө, дьиэрэйдэ. Дьэ, соһуччу үөрүү буолла!

Истээччилэр бары да мичээрдэһэн, үөрэн-көтөн, төлөпүөннэригэр уһулан үйэтиттилэр, ытыстарын таһыннылар, санаалара көтөҕүллэн, пуойастарыгар киирдилэр.