Волейбол күрэҕэ үрдүк тэрээһиннээхтик ааста

Бу күннэргэ түөрт сыл тохтуу сылдьан баран, Мэҥэ Хаҥалас улууһугар Михаил Харитонович Кузнецов аатынан VIII төгүлүн волейболга хамаанданан күрэхтэһии кини төрөөбүт Нуораҕанатыгар ыытылынна.

Волейбол турнира Мэҥэ Хаҥалас улууһун дьаһалтатын Физическэй култуураҕа уонна успуорка салалтатын календарнай былааныгар киирэн, Дьабыыл нэһилиэгин дьаһалтата, волейбол федерацията, дьиэ кэргэнэ, үөрэнээччилэрэ, табаарыстара көмөлөөн үрдүк таһымнаахтык ааста. Уолаттар уонна кыргыттар хамаандалара икки сааланан сарсыардаттан киэһээҥҥэ диэри күөн көрүстүлэр. Үс бөлөхтөн аҕыс бастыҥ хамаанда 1/4 финалга, онтон 1/2 финалга, ол кэннэ мэтээл иһин кииристилэр. Кыргыттарга 1 м – Матта, 2 м – Бэдьимэ, 3 м – Хара, 4 м – Тарат хамаандалара таҕыстылар. Оттон уолаттарга 1 м – Бэдьимэ, 2 м – Хара, 3 м – Томтор, 4 м – Аллараа Бэстээх буоллулар.

Балаһыанньа уонна эрдэттэн сөбүлэһии быһыытынан 2-лии легионер көҥүллэнэр диэн быһаарбыттара, ол эрээри Мэҥэттэн биир оскуола оҕото хайаан да былаһааккаҕа оонньуохтаах диэн ирдэбиллээх этэ. Ол түмүгэр састаап күүһүрэн, оонньуу таһыма өссө үрдээтэ. Томтор, Бэстээх, Чыамайыкы уолаттара бэйэбит эрэ оонньуубут, атын дьону ыҥырбаппыт диэн быһаарынан, күүстээх оонньууну көрдөрдүлэр, ону эмиэ бэлиэтиэххэ наада.

Кыайыылаахтарга Кубок, мэтээл уонна чөмпүйүөннэргэ уу харчынан 21 тыһ. солк. тиксэн спортсменнар астыннылар. Манна бэлиэтээн эттэххэ, Михаил Харитонович Абаҕа орто оскуолатыгар бииргэ үөрэммит оҕолоро 42 тыһ. солк. туруорбуттара хайҕаллаах суол.

Хамаанданан Кубок уопсай түмүгүнэн бэдьимэлэргэ туттарылынна, бирииһэ – 40 тыһ. солк. Итини таһынан номинацияларынан бастыҥнар ааттаннылар. Ол курдук «Бастыҥ оонньооччу» – кыргыттарга Анжела Федорова (Матта, Дьокуускай) уолаттарга – Артем Готовцев (Бэдьимэ, Мэҥэ Ханалас) буоллулар уонна М.Х. Кузнецов кыргыттара туруорбут бириистэрин, 20-лии тыһ. солк. туттулар. Бастыҥ оонньооччуларынан Клавдия Федорова, Юрий Афанасьев, Дария Владимирова, Василий Афанасьев, Наталья Старкова, Станислав Варламов, Вилюяна Ильина, Алексей Шепелев буоллулар. «Көдьүүстээх оонньооччу» ааты хас да оонньооччу ылла: Сардана Баянакова, Валерия Хастаева, Анна Борисова, Валерия Захарова, Руслана Аммосова, Иннокентий Артамонов, Александр Аммосов, Валериан Неустроев, Семен Баишев, Ростислав Афонскай, Арсен Жирков, 4 бииргэ төрөөбүт Халдеевтар, Айтал Борисов уонна да атыттар.

Михаил Харитоновичка үөрэммит хас да көлүөнэ оҕолор, 1991-2008 сыллардаах Дьабыыл орто оскуолатын выпускниктара харчынан, сертификатынан улахан бириистэри туруордулар.

«Маны таһынан тэрээһиҥҥэ, анал бириистэргэ аймахтар, нэһилиэк дьоно, тэрилтэлэр көхтөөхтүк кытыннылар. Ол курдук, харчынан улахан көмөнү оҥорбут Г.И., Н.Н. Петровтарга, В.С., Н.В. Петровтарга, Григорий, Полина Тодышевтарга, анал бириис олохтообут Стручковтарга итиэннэ Березкиннар, Ивановтар, Ефимовтар дьиэ кэргэттэригэр, Мэҥэ Ханалас волейболга инстаграм бөлөҕүн кыргыттарыгар уонна Михаил Харитонович табаарыстарыгар дьиэ кэргэн аатыттан улахан махталбытын тириэрдэбит», — диэн Михаил Харитонович кыыһа ХИФУ юридическай факультетын ыстаарсай преподавателэ Татьяна Иванова махталын тириэрдэр.