Салгыы
Волейбол маассабаһы үөскэтэр

Волейбол маассабаһы үөскэтэр

Ааптар:
15.02.2023, 21:06
Ааптар хаартыскаҕа түһэриитэ
Бөлөххө киир:

Маассабай успуорду сайыннарыыга, чуолаан, волейболу таһаарыыга СӨ волейболга федерацията сэргэх үлэни ыытар.

Нэһилиэктэр икки ардыларыгар уонна бэтэрээннэргэ күрэхтэһиилэр улахан сэргэхситиини үөскэттилэр. Күрэхтэһиилэр икки сиринэн бардылар. Бүлүүгэ улахан нэһилиэктэр, Хадаарга дьоҕус нэһилиэктэр, Дьокуускайга бэтэрээннэр хамаандалара күрэхтэстилэр. Томороон тымныыны аахсыбакка кэлэн-баран айаннаатылар.

Сүрүн сыал-сорук маассабаһы үрдэтиигэ туһаайыллар. Дьоҕус уонна улахан нэһилиэктэр икки бөлөххө араарылланнар, нэһилиэктэр икки ардыларыгар уонна бэтэрээннэргэ күрэхтэһиилэрэ улахан сэргэхситиини үөскэтэллэр. Ааспыт сылларга Нам Үөдэйигэр. Хамаҕаттатыгар, Уус-Алдан Курбуһаҕар, Мэҥэ Хаҥалас Томторугар, Бүлүү диэки Хампанан, Үөһээ Бүлүүгэ Хоронон, сыл аайы уларытыһан күрэхтэһиилэр буолбуттара кэрэхсэбиллээх.
Сонун тэрээһининэн, хайа нэһилиэккэ күрэхтэһии ыытылларынан, онно успуорт сайдыытыгар, волейболга ситиһиилэрдээх дьон чиэстэнэллэр. Волейболу көҕүлээччилэр өрө тутуллаллар. Ону дьон сөбүлүүр, ылынар. Сыл аайы биир киһи бэлиэтэнэрэ тутах, сылаалаах да буолар. Онон, ити тэрийэр үлэ сөптөөх хайысхата. Дьон бэйэлэрин үптэринэн кэлэллэр-бараллар. Өссө көмөлөһөр, өйүүр баһылыктардаах нэһилиэктэр бааллар. Маассабаһы көҕүлүүр, сайыннарар нэһилиэктэр Бэдьимэ, Танда, Сулҕаччы, Алтан, Хампа, Кыргыдай, Тамалакаан хайҕабылга сылдьаллар. Оттон волейболистар баһыйар үгүстэрэ от-мас үлэһиттэрэ, урбаанньыттар, учууталлар.
Томороон тымныыны аахсыбакка кэлэн-баран айанныыллар. Улуустартан дьахталларга уонна эр дьоҥҥо иккилии хамаандалары туруортаатылар. Сааһыттан тутулуга суох. Өрөспүүбүлүкэ нэһилиэктэрэ сылын аайы түмсэн күрэхтэһэргэ бэлэмнэр. Сүрүн сыал-сорук маассабаһы өрө көтөҕүүгэ туһаайыллар. Өйдөбүнньүк мэтээллэр, дипломнар туттарылыыннылар. Бастыҥ волейболистарга, хамаандалары тэрийэн аҕалбыт дьоҥҥо биһирэбил наҕараадалар бааллар. Күрэхтэһиини көҕүлээн тэрийэр волейбол Федерациятын толорооччу дириэктэрэ, волейбол фаната Яков Сивцев этэринэн, сыаналаах бириистэри туруордахха күүстээхтэр эрэ кэлэллэр. Оттон маассабас сүтэр, күлүккэ барар. Инньэ гынан, тэҥ “баайыылаахтар” кэлэллэр. Хадаарга икки сааланан баппакка, Хайахсыкка тиийэн икки саалаҕа оонньооһун тэриллибит. Нэһилиэк баһылыга Афанасий Степанов сүүрэн-көтөн, успуорду өйдүүрүн, өйүүрүн көрдөрбүтэ хайҕаллаах. Олохтоохтор күүстэринэн көрдөрүллүбүт кэнсиэргэ ыалдьыт-спортсменнар эмиэ кыттыспыттара көҕү, сэҥээриини үөскэппитэ өссө үчүгэй, киһи үөрэр.

Күрэхтэһээччилэр санааларын хото үллэһиннилэр.
Быйыл Бүлүүгэ “Эрчим” успуорт комплексыгар ыытыллыбыт улахан нэһилиэктэр күрэхтэһиилэригэр дьахталларга Үөһээ-Бүлүү нэһилиэгэ бастаата, Бүлүү Хампата иккис, Мэҥэттэн “Уол Табаҕа” үһүс миэстэлэннилэр. Эр дьоҥҥо Намтан Хамаҕатта бастаата, Майаттан Хара нэһилиэгэ — иккис, Майа нэһилиэгэ үһүс буоллулар. Бастыҥ оонньооччуларынан Лилия Яковлева, Роза Николаева, Роза Калачева, Алия Обуева, Павел Обутов, Максим Соломонов, Игнат Прохоров, Семен Афанасьев ааттаннылар.
Урукку өттүгэр суох нэһилиэктэр символическай сүүмэрдэммит хамаандатыгар Денис Осетров, Виталий Герасимов, Юрий Харитонов, Семен Баишев, Юрий Афанасьев, Геннадий Павлов, Наталья Баранова, Лилия Яковлева, Евдокия Александрова, Роза Николаева, Евдокия Романова, Роза Семенова киллэрилиннилэр.
Бэтэрээннэргэ аммалар 65 үөһэ саастаахтарга үһүс буоллулар. Прокопий Пахомов уонна Дмитрий Лобанов кэпсииллэринэн, хамаанданы Иван Иванович Синтизов хомуйан аҕалбыт. Күрэхтэһии тэрээһинин астыммыттар. Дьиэлэригэр-уоттарыгар улууска биллэриллибит “кырдьаҕастар дэкээдэлэригэр” оонньообуттар, теннистииллэр, бильярдыыллар. Тыа дьонун сиэринэн, сүөһү, сылгы хаһаайыстыбалаахтар. Оҕолоро, сиэннэрэ сайын кэлэннэр окко көмөлөһөллөр. Биир уоллара Никита Лобанов олорон волейболга Арассыыйа призера, успуорт маастара. Өрөспүүбүлүкэ күрэхтэһиитигэр аан бастаан кыттыбыттар.
Бэтэрээн дьахталларга Үөһээ Дьааҥы хамаандатын хапытаана, физкултуура учуутала Татьяна Попова кэпсииринэн, улуустарын баһылыга Владислав Слепцов, волейбол федерациятын салайааччыта Петр Слепцов айаннарыгар көмөлөһөн Бүлүүгэ күрэхтэһэ кэлбиттэр. Боруулаахтан, Табалаахтан, Адыаччыттан бааллар. Нэһилиэктэринэн күрэхтэһиилэр буолуталыыллар. Усуйаанаҕа тиийэн күрэхтэһэннэр бастаабыттар. Хамаанда бэрэстэбиитэлэ Розалия Кармалах. Арктическай улуустарга маннык күрэхтэһии тэриллэрэ буоллар диэн баҕа санааларын биллэрэллэр. Нэһилиэктэргэ спортивнай саалалар хото тутулланнар, успуордунан дьарыктанааччы элбээбит.
Нэһилиэктэргэ Мэҥэ Хаҥалас Табаҕатыттан “Уол Табаҕа” хамаанда хапытаана Александра Яковлева этэринэн, дьоннорун, нэһилиэктэрин таһаараары кэлбиттэр. Тымныыттан толлубакка. Аҕатын иитиитинэн, успуорду өрө тутар. Күрэхтэһиилэргэ дьону көҕүлүүр, түмэр, тэрийэр. Биэс киһилээх дьиэ кэргэн бары күн аайы спортивнай саалаҕа сылдьаллар. Кэргэнинээн олохтоохтору волейболга уһуйаллар. Улуус сүүмэрдэммит хамаандатыгар оонньууллар. Ыал быһыытынан хаһаайыстыбалаахтар, сүүрбэччэ сүөһүлээхтэр, үс үөр сылгылаахтар. Ходуһа сирдээхтэр. Аттаран, үүт-эт астарын туттаран, бэйэлэрин ииттинэн олороллор. Сүүрэн-көтөн күрэхтэһиилэргэ бэлэмнэнэллэр. Хамаандаҕа спортивнай форма ылан түҥэтэллэр. Эрдэ кэпсэтэннэр массыына булбуттар, баһылыктара Юрий Афанасьевич успуорду өйдүүр буолан, көмөлөһөр. Чөл олоххо тардыһаллар. Успуорду пропагандалыырыттан үөрэр. Маннык хамсааһын киэҥник тарҕанарыгар баҕатын биллэрэр.
Бэтэрээннэргэ Горнайтан волейбол федерациятын толорооччу дириэктэрэ Майаана Моруот нэһилиэктэр күрэхтэһиилэрин биһириир. Улуустарыгар комплекснай спартакиада волейбол күрэхтэһиитинэн саҕаламмыт. Нэһилиэктэр бары кыттыбыттар. Хамаанданы тириэньэрдэр кэлэн бэлэмнээбиттэр. Иккис миэстэлэнэннэр үөрүүлэрэ улахан. Успуорт тутуулара олоххо киллэриллэ тураллар. 1950-с сылларга өрөспүүбүлүкэ күүстээх волейболиһа, “Спартак” общество бэрэссэдээтэлэ С.С. Жирков сырдык аатыгар эдэрдэргэ өрөспүүбүлүкэ күрэхтэһиитин тэрийэн ыытарга бэлэмнэнэ сылдьаллар. Бороҕоннооҕу Оонньууларга уолаттарга, кыргыттарга финалга тахсаннар улахан ситиһиилэммиттэр. Дьиэ кэргэн күрэхтэһиитин ыытаннар Ил Дархан 800 тыһ.гранын ылбыттар. Үлэлэрин киэҥник тарҕатар санаалаахтарын үөрэ-көтө үллэстэр. Эдэрдэргэ уонна бэтэрээннэргэ күрэхтэһиилэри сыл аайы ыыталлара үтүө үгэскэ кубулуйбут.

Ити курдук, Сахабыт сиригэр физкултуура уонна успуорт маассабаһын үрдэтиигэ, олохтоох ыччаты, нэһилиэнньэни успуорка уһуйууга, чөл олоҕу тутуһууга эрчимнээх тэрийэр-көҕүлүүр үлэ барара чахчы  кэрэхсэбиллээх, сүргэни көтөҕөр.

Баһылай Посельскай,

Дьокуускай.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
28 марта
  • -13°C
  • Ощущается: -20°Влажность: 52% Скорость ветра: 4 м/с

Сообщить об опечатке

Текст, который будет отправлен нашим редакторам: