Волонтер, эн ааккар сүгүрүйэн…

Ханна баҕарар, ыксал буоллаҕына, кыһалҕа үөскээтэҕинэ куруук көмөҕө кэлэргэ бэлэм дьон баар буолаллар. Ол сиэринэн байыаннай дьайыы саҕаланыаҕыттан үгүс киһи көмөлөһө сылдьар. Бүгүн олортон икки киһи туһунан кэпсиэм. Дьокуускай куоракка олорор Дмитрий Павлов уонна Москваҕа олорор биир дойдулаахпыт Альбина Пермякова — кинилэр тус-туспа идэлээх дьон, ол эрээри биир үтүө дьыаланы оҥоро сылдьаллар.

ТИМИР УУҺУН ҮТҮӨ ДЬЫАЛАТА

Үөһээ Бүлүү улууһун Ороһутуттан төрүттээх Дмитрий Павлов оҥорбут «Якутяночка» эвакуациялыыр моно-көлүөһэ наһыылкалара байыаннай дьайыыга олус туһалаахтара кэнники элбэхтик ахтыллар буолла. Бу сайын «Хирург» диэн позывнойдаах миэдиги кытары кэпсэтэрбэр, бу маннык наһыылкалар тиийэннэр, улаханнык абыраабыттарын эппитэ. Онон сиэттэрэн, Дмитрий Павловы кытары кэпсэттим. Кини оҥоһугун туһунан бу курдук кэпсиир:

«Мин сыбаарсыкпын, кыра сыахтаахпын. Былырыын олунньуттан байыаннай дьайыыга моно-көлүөһэ эбэтэр биир көлүөһэлээх тэлиэскэ оҥорон, ыытан саҕалаабытым. Бастаан Москваҕа олорор Алексей диэн инженер киһини кытары сүбэлэһэн, толкуйдаан оҥорбуппут. Москваҕа эмиэ биһиги курдук бэйэлэрэ түмсэн толкуйдаан, «Анютка» диэн эвакуациялыыр тэлиэскэлэри оҥорор дьон баар. Биһиги уолаттарбытыгар оннук тэлиэскэлэр наада буоллулар диэн, кинилэртэн бырайыак көрдөөбүтүм, ону биэрбэтэхтэрэ. Ол эрээри, биһиэнигэр майгынныыр, атын моһуоннаах тэлиэскэни оҥоро сылдьар киһи баар диэн, ону кытары билиһиннэрбиттэрэ. Кини идиэйэтин туһанан бэйэбит тупсаран оҥорон саҕалаабыппыт. Биһиги тэлиэскэбит наһыылкаҕа бэлисипиэт биир көлүөһэтэ иилиллэр тэрил буолар. Атыттартан уратыта — ырычаах баттаатыҥ да, сиргэ сытынан кэбиһэр уонна уонча сантиметрынан намыһах. Бүгүҥҥү күҥҥэ 70 тэлиэскэни оҥорон ыыттыбыт. Биир тэлиэскэҕэ 140‑тан тахса деталь наада. Листовой тимирин лазерынан быһабыт, токурутарга бэйэбит үстүрүмүөн оҥостобут. Тиийбэт тимирдэрбитин, буолталарбытын Москваттан, Санкт-Петербуртан сакаастаан ылларабыт. Бастаан 20‑чэ тэлиэскэни бэйэм харчыбынан оҥорбутум, онтон кыаммаккабын, успуонсар көрдөөбүтүм. Көлөһөлөрбүтүн бастаан Пермьтэн сакаастыыр этибит, онтон харчыбыт кырыымчык буолан, маннааҕы «Столичнай» ырыынактан ыла сылдьыбыппыт. Билигин «Тандем» маҕаһыын 30 көлүөһэ бэлэхтээтэ. Кэлин элбэх киһи көмөлөстө. Холобур, тэрилтэлэр тэлиэскэни төлүүллэр, ону кинилэр эппит киһилэригэр аадырыстаан ыытабыт. Доҕотторбор, успуонсардарга көмөлөрүн иһин махтаныахпын баҕарабын. Үтүө санааҕыт үс бүк үрдээн үтүөнэн эргийдин!»

Үтүө бачыымы өйүөххэ!

Тэлиэскэлэри ардыгар дронунан быраҕан эстэрэллэр, ардыгар бэйэлэрэ алдьанар түгэннэрэ да баар буоллаҕа. Дмитрий, үгүс уол махталын биллэрэр, ол эрээри туга алдьанарын, тугу тупсарыахха сөбүн эппэттэр диир. Бу тэрил бааһырбыттары уонна өлүктэри таһаарарга олус наадалаах диэн анараа сылдьар уолаттар этэллэрин хаста даҕаны истэн турабын.

Былаан быһыытынан ыйга 100 тэлиэскэни оҥоруохтаахтара, үп-харчы кырыымчыгынан, кыаллыбат эбит. Биир тэлиэскэ сыаната 30 тыһ. солк. буолар. Выпусктар түмсүүлэрэ, кылааһынньыктар, табаарыстар диэн харчы бырахсан, биирдэ эмит маннык тэлиэскэни ылан ыыталлар эбит. Бу үтүө бачыымы батыһан атыттар даҕаны көмөлөһүөхтэрин сөп буоллаҕа. Бу күннэргэ байыаннай дьайыыга сылдьар уолаттар уонча тэлиэскэни сакаастаабыттар, ол эрээри, эмиэ үп-харчы боппуруоһуттан иҥнэр. Онон үтүө санаалаах дьон, тэрилтэлэр, көмө буолуохтара диэн эрэнэбит.

Олох оргуйар үөһүгэр

Маннык, дьоҥҥо көмөлөһөргө дьулуһар дьонтон биирдэстэринэн “Боевое братство без границ” норуоттар икки ардыларынааҕы пуонда волонтера, Москваҕа Саха сиринээҕи бастайааннай бэрэстэбиитэлистибэ иһинэн үлэлиир уопсастыбаннай сэбиэт чилиэнэ Альбина Пермякова буолар. Кини олоххо көхтөөх сыһыана уонна атыттарга көмөлөһөр баҕата барыбытыгар холобур буолуон сөп.

Волонтер суолунан

“Боевое братство без границ” пуонда байыаннай сулууспалаахтары уонна кинилэр дьиэ кэргэттэрин өйөөһүнүнэн, ону таһынан, гуманитарнай көмөнү оҥоруунунан дьарыктанар. Альбина бэйэтин баҕатынан араас аахсыйаларга, үп хомуйууларын тэрийиигэ, ону таһынан, байыаннай дьайыыга наадалаах табаардары тиэрдиигэ кыттар. Кини социальнай ситимнэр уонна тэрээһиннэр нөҥүө байыаннай сулууспалаахтар уонна кинилэр дьиэ кэргэттэрин кыһалҕаларыгар уопсастыба болҕомтотун тардар. Доҕотторун уонна атын да дьону бэйэтигэр тардан, кыаллыбаты да кыайыахха сөбүн итэҕэтэр.

Альбина Пермякова бу сайын байыаннай дьайыы кыттыылааҕа Дайаана ыараханнык бааһыран килииникэҕэ сыттаҕына, кыыс ыарахан балаһыанньатын тута өйдөөн, “Боевое братство без границ” пуонда бэрэссэдээтэлэ Виктор Сивохинныын билиһиннэрэн, кыһалҕаны быһаарарга көмөлөспүтэ.

Волонтер Альбина Пермякова, дьиҥэ, үлэтэ, идиэйэтэ элбэх, Москваҕа ыытыллар бары тэрээһиннэргэ көхтөөхтүк кыттар, кыһалҕалаах түгэннэргэ туора туран хаалбат, илиитин утары уунан көмөлөһөргө дьулуһар.

САНАА

Волонтер Альбина Пермякова бэйэтин туһунан бу курдук кэпсиир:

— Мин 2019 сылтан Москваҕа олоробун. Биэнсийэҕэ тахсыам иннинэ 16 сыл «Саха» көрдөрөр-иһитиннэрэр хампаанньаҕа информационнай биэриилэргэ эрэдээктэрдээбитим. Филолог-культуролог идэлээх буоламмын, Москваҕа көһөн кэлээт, араас быыстапкаларга кыттан саҕалаабытым. Оҕо эрдэхпиттэн араас аккырыыккалары, значоктары, буоста мааркаларын кэллиэксиэйэлиибин. Бу дьарыгым Москваҕа олус туһалаабыта. Маны тэҥэ Дьокуускайга олорон Сайсары управатыгар дьахталлар кэмитиэттэригэр баарым, уопсайынан, уопсастыбаннай үлэнэн куруук дьарыктанар буолан, Москваҕа баар уопсастыбаннай хамсааһыннарга киирбитим. Билигин устуорук, суруналыыс Каролина Коваль бэрэссэдээтэллээх «Союз русских женщин» холбоһук чилиэнэбин. Байыаннай дьайыы саҕаланыаҕыттан «Боевое братство без границ» пуондаҕа волонтердуубун. Мин уопсастыбаннай үлэм сүрүннээн араас хабааннаах докумуоннары толоруу, көмө сурук суруйуута, тэрээһиннэри иилээн-саҕалаан ыытыы, кэллиэксийэлээччилэри түмэн сабыылаах аукциону тэрийэн киирбит үбү эми-тому атыылаһыыга, байыаннайдарга көмө оҥоруутугар ыытабыт. Быйыл Москваҕа Саха сиринээҕи бастайааннай бэрэстэбиитэлистибэ иһинэн үлэлиир Уопсастыбаннай сэбиэт чилиэнэ буолбутум, онон биир дойдулаахтарбар, чуолаан, волонтердарга көмөлөһөбүн.

ХААРТЫСКАЛАР А. ПЕРМЯКОВА УОННА Д. ПАВЛОВ ТУС АРХЫЫПТАРЫТТАН.