Волонтер-миэдиктэр өрөспүүбүлүкэтээҕи пуорумнара саҕаланна

Бүгүн, сэтинньи 27 күнүгэр,  М.Николаев аатынан Мэдиссиинэ Национальнай киинигэр “Николаев” кэмпириэнсийэлиир саалаҕа Саха сирин волонтер-миэдиктэрин өрөспүүбүлүкэтээҕи  пуорума саҕаланна.

Пуорум сүрүн ыалдьытынан “Волонтер-миэдиктэр” Бүтүн Арассыыйатааҕы уопсастыбаннай хамсааһын бэрэссэдээтэлэ Анна Бабкина буолла.

Бүгүн пуорумҥа сүрэхтэрин баҕатынан дьоҥҥо көмөлөһөр, үтүөнү уонна сырдыгы бэлэхтиир үтүө санаалаах дьон муһуннулар. Волонтер-миэдиктэр аналлара – дьон олоҕун быыһааһын уонна кинилэр эрэйдэрин, кыһалҕаларын аҕыйатыы.

Волонтер-миэдиктэр бүгүҥҥү пуорумнара уопуту атастаһар былаһаакка эрэ буолбакка, саҥа ситиһиилэргэ күүһү-уоҕу мунньунар, билиини кэҥэтэр былаһаакканан буолар.

Пуорум  СӨ Доруобуйа харыстабылын миниистирин солбуйааччы Дмитрий  Сергин эҕэрдэтинэн саҕаланна.

Пуорум икки күн үлэлиэҕэ.

ххх

Светлана Давыдова, СӨ Судаарыстыбаннай Мунньаҕын (Ил Түмэн) дьокутаата:

-Волонтер-миэдиктэр  түмсүүлэрэ  тэриллиэҕиттэн ыла үлэтин олус ситиһиилээхтик саҕалаабыта.  Саамай сүрүнэ — дойдубутугар хамсык саҕаламмытыгар сүрүн көмөлөһөөччүлэрбитинэн кинилэр буолбуттара. Тоҕо диэтэххэ, аан бастаан ыарыыны утары хайдах охсуһары, тугу гыныахтаахпытын билбэппит баар этэ. Ол гынан баран, биир ыйынан биһиги волонтер-миэдиктэрбит   тута биһиэхэ көмөлөһөн барбыттара. Быраастар, доруобуйа харыстабылын салайааччылара ол иһин кинилэргэ олус махтаналлар. Тоҕо диэтэххэ, кинилэр кыахтарын, үлэлэрэ түмүктээҕин чуолаан хамсык кэмигэр үчүгэйдик билбиппит. Хамсык иккис сылыгар биһиги  волонтер-миэдиктэрэ суох сатаммаппытын өйдөөбүппүт.

Дойдуга байыаннай дьайыы саҕаламмытыгар кылаабынай бырааһынан үлэлии сылдьан элбэх волонтеру Москва, Санкт-Петербург госпиталларыгар көрсүбүтүм. Кинилэр тугунан да сыаналаммат оруоллаахтара онно чаҕылхайдык көстүбүтэ. Кинилэр байыаннай дьайыыга бааһырбыттары сытар оронноруттан саҕалаан, барытыгар арыаллыы сылдьыбыттара. Ол иһин: “Эһиги,волонтер-миэдиктэр,  мэдиссиинэ  үлэһиттэрин кэлэктииптэригэр  хайыы үйэ киирдигит”, —  диэн бэлиэтиэхпин баҕарабын.

Волонтер-миэдиктэр  хамсааһыннара хаһан да тохтоон хаалбакка, мэлдьи баар буола турдун. Тоҕо диэтэххэ, эһиги быраактыкаҕа дьиҥнээх көмөнү оҥоро сылдьаҕыт! Пуорум ситиһиилээхтик аастын.

Алексей Никифоров, М.К.Аммосов аатынан ХИФУ мэдиссиинэҕэ институтун волонтер-миэдиктэрин салайааччыта :

-Мин өссө оскуолаҕа үөрэнэ сылдьаммын бастакы мэдиссиинэ волонтерын оскуолатын ааспытым. Ол кэнниттэн күүскэ үлэлээн барбытым. Бастаан мэдиссиинэ кэллиэһигэр үөрэммитим. Онно сылдьан көннөрү волонтер этим, онтон ыстаабы сүрүннээччи буолбутум. Билигин Хотугулуу-Илиҥҥи федеральнай университекка ыстаап салайааччыта буолабын.

Биһиги араас аахсыйалары, тэрээһиннэри ыытабыт, оскуолаларга, лааҕырдарга бараммыт кэккэ лиэксийэлэри, билиини-көрүүнү тургутар оонньуулары, тэрээһиннэри ыытабыт. Ону тэҥэ балыыһаларга быраастарга, сиэстэрэлэргэ көмөлөһөбүт.

Мин санаабар, мэдиссиинэ волонтердара  олус наадалаахтар. Кинилэр сотору доруобуйа харыстабылыгар үлэлиэхтээх быраастар, сиэстэрэлэр буолаллар. Онон  эрдэттэн уопут ылаллар, бэйэлэрин биир санаалаахтарын кытары көрсөллөр. Инникитин тугу үлэлиэхтээхтэрин көрө-истэ сылдьаллар.

Бүгүҥҥү пуоруммут ситиһиилээхтик ааһарыгар баҕарабын. Сүрүнэ диэн, пуоруммутугар хас да ыалдьыты ыҥырдыбыт. Ол иһигэр федеральнай сүрүннээччи Анна Витальевна Бабкина кэлбититтэн олус үөрэ сылдьабын.