Волонтердар көмөлөһөргө бэлэмнэр

Байыаннай дьайыы кыттыылаахтара уонна кинилэр дьиэ кэргэттэрэ көмөҕө наадыйдахтарына, куорат эбэтэр улуус ыстаабыгар    хаһан баҕарар биллэриэхтэрин сөп.

Бу туһунан #МЫВМЕСТЕ Арассыыйатааҕы аахсыйа эрэгийиэннээҕи ыстаабын салайар Айыллаан Винокуров иһитиннэрэр.

«Саас буолбутунан биһиги волонтердарбыт байыаннай сулууспалаахтар дьиэ кэргэттэригэр көмөлөһөргө бэлэмнэр. Тиэргэннэригэр хаардарын күрдьүөхтэрэ, кырыыһаларыттан хаар түһэриэхтэрэ, күрүөлэрин иһин өрө тардыахтара«, — диир кини.

Ыстаап салайааччыта сайаапканы 122 нүөмэргэ эрийэн биэриэхтэрин сөп диэн санатта.

«Маны таһынан, байыастарга гуманитарнай көмөнү хомуйуу салҕанар. Көмөнү оҥорор уонна байыастарга аадырыстаах баһыылканы ыытар буоллаххытына: Дьокуускай, Бестужев-Марлинскай уул. 5 (ДОСААФ) аҕалан туттарыаххытын сөп«, — диэн санатар Айыллаан Винокуров.

СӨ Ил Дарханын уонна Бырабыыталыстыбатын пресс-сулууспата