Волонтердар ыалдьыттары үөрэ-көтө көрсөллөр

Олоҥхо ыһыаҕар волонтер оҕолор ыалдьыттары үөрэ-көтө көрсөллөр, сирдээн, сүбэлээн-амалаан биэрэллэр.

Волонтердар бөлөхтөрүн салайар Анастасия Васильева кэпсээбитинэн, сүүстэн тахса волонтер үлэлии сылдьар.

Сүрүннээн кэлбит дьону арыаллыыллар, сирдииллэр, сорохтор хомуйууга үлэлииллэр.

Эдьиийдии-балыстыы Ольга уонна Лена үөрэ-көтө, мичилийэ тураллар. Ольга волонтердаабыта хаһыс да сыла буолбут.
— Тэрээһинэ олус үчүгэй. Биһигини илдьэллэр-аҕалаллар, куратордаахпыт. Биһиги оройуон дьаһалтатын хайысхатынан үлэлиибит. Сүрүннээн дьону көрсөргө, сирдииргэ турабыт.

Бүгүҥҥүттэн, төһө да ардахтаах буоллар, бырааһынньык тыына билиннэ. Элбэх киһи кэллэ, эрэпэтииссийэ бөҕө. Биһиэхэ наһаа интэриэһинэй, барытын көрө-истэ сылдьабыт. Атын омуктар култуураларын, үгэстэрин, тутууларын, таҥастарын-саптарын көрөр наһаа интэриэһинэй. Бары олус кыраһыабайдар.
Биһиги маннык улахан бырааһынньыкка кыттыһа, үлэлии сылдьарбытыттан олус астынабыт, — диэн кэпсээтилэр.