Волонтердар үлэлэрин тэрийиигэ методическай ыйынньык таҕыста

Бүгүн, олунньу 13 күнүгэр, Дьокуускай куоракка «Патриот» ыччат киинигэр оҕону, ыччаты патриотическай иитиигэ улахан суолталаах тэрээһин буолла.

«Патриот» ыччат киинэ «Саха Өрөспүүбүлүкэтигэр добровольческай (волонтерскай) үлэни тэрийиигэ методическай хомуурунньук» диэн кинигэтин билиһиннэрдэ. Бу тэрээһини Ыччат дьыалаларыгар федеральнай ааҕыныстыба (Росмолодежь) федеральнай тэрилтэтэ өйөөтө уонна эрэгийиэн ситэриилээх былааһын уорганнарын кытары ыкса ситимнээх үлэ түмүгэр олоххо киирэр «Ыччат уонна оҕолор» диэн улахан федеральнай бырайыак сорҕото буолар.

Саҥа хомуурунньук Чурапчытааҕы Физическэй култууура уонна успуорт судаарыстыбаннай институтун үөрэх-методическай сүбэтин кытары «Патриот» киин үлэһиттэрин кэллэктиибэ бииргэ оҥорбут практическай матырыйааллара буолар.

Ыччат уонна социальнай коммуникацияларга миниистири солбуйааччы Александр Максимов волонтердар, кинилэр үлэлэрин туһунан маннык эттэ:

«Бүгүн биһиги волонтердарбытын хомуйдубут. Волонтерство – бу дьону түмэр, биһиги өрөспүүбүлүкэбитигэр дьиҥнээх уонна наадалаах үтүө дьыалалары оҥорор дьиҥнээх күүс. Ааспыт сылга волонтерскай хамсааһыннар 135 туоннаттан тахса гуманитарнай таһаҕаһы хомуйан, ол иһигэр 5000-тан тахса аадырыстаах көмөнү байыаннай дьайыыга ыыппыта. Бүгүн олус улахан тэрээһин – волонтерскай хамсааһын тэрийээччилэригэр анаммыт «төгүрүк остуол». Ол түмүгүнэн волонтердарга аналлаах методическай хомуурунньук билиһиннэриллиэҕэ, онно добровольческай үлэни тэрийии уонна сайыннарыы алгоритмалара чуолкайдык ыйылыннылар».

Кинигэ тахсыытын, ис хоһоонун туһунан социологическай билим хандьыбаата, Чурапчытааҕы Физическэй култуура уонна успуорт судаарыстыбаннай институтун социальнай-гуманитарнай дисциплиналар хафедратын доцена, Галина Алексеева кэпсиир:

«Бүгүн биһиги волонтердар үлэлэрин тэрийээччилэргэ аналлаах методическай сүбэлэр хомуурунньуктарын билиһиннэрдибит. Бу хомуурунньук биһиги өрөспүүбүлүкэбитигэр тэриллиилээх добровольчествоны сайыннарыыга туһаайыллар. Волонтерскай үлэ аныгы кэмҥэ үтүө дьыалалары оҥорууну эрэ буолбакка, кэккэ бэрээдэги тутуһууну ирдиир. Холобур, добро.ру сайтка волонтердыырга ирдэбиллэр ыйыллыбыттарын курдук, үтүөнү оҥорууга бааллары бэлиэтиир наада. Бу бааллар волонтердар инники олохторугар учуоттаналлар. Уопсайынан, волонтерство биһиги дойдубут удьуор утумун, үтүө тыынын, патриотизмы биир санаалаах буолууну үрдэтэргэ уонна харыстааһыҥҥа туһаайыллар. Хомуурунньук 5 салааттан турар, ол иһигэр биһиги өрөспүүбүлүкэбитигэр барар үлэ уратылара эмиэ киирдилэр.

2016 сылтан ыла биһиги өрөспүүбүлүкэбитигэр волонтерство сайдыытын туһунан социологическай чинчийии ыыппыппыт»

Таһаарыы биэс сүрүн салааттан турар, хас биирдии салаа волонтердар үлэлэрин тэрийээччилэр хайысхаларын хабар.

Бастакы салаа өрөспүүбүлүкэҕэ аныгы волонтерскай хамсааһын уратыларыгар ананар, иккис салаа доброволецтары өйөөһүн нуорма-быраап баазатын докумуоннара киирэллэр, үһүс салаа Саха Өрөспүүбүлүкэтин усулуобуйатыгар волонтерскай көҕүлээһиннэр сайдыыларын уратыларыгар ананар. Төрдүс салаа волонтердары салайыыга сиһилии алгоритмы уонна кинилэри ситимниир механизмы киллэрэр, бэһис салаа добровольческай холбоһуктар көдьүүстээх үлэлэригэр туһалаах тэриллэри уонна сүбэлэри биэрии.

Онон, бу ыччаты иитии-үөрэтии кинигэтэ өрөспүүбүлүкэҕэ добровольческай хамсааһыны тэрийиинэн уонна сайыннарыынан дьарыктанар дьоҥҥо эрэллээх көмөлөһөөччү буолуоҕа. Бу кинигэ тахсыбыт сыала-соруга – эдэр актыбыыстары өйөөһүн, волонтерскай бырайыактар салайааччыларын идэлэрин таһымын үрдэтии уонна ыччат социальнай көҕүн эйгэтигэр бастыҥ холобурдары, көдьүүстээх үлэни тарҕатыы буолар.
«Төгүрүк остуол» хабааннаах барбыт тэрээһиҥҥэ волонтердар бэйэлэрин санааларын, үлэ хайысхатын, волонтер хайдах буолуохтааҕын, дьону кытары хайдах кэпсэтиэхтээҕин, о.д.а. дьүүллэстилэр. Сүрүннээн үлэлиэн баҕалаах волонтердарга, хамсааһыннарга усулуобуйа ситэ оҥоһуллубатын, бэйэлэрин баҕаларынан көмөҕө үлэлиир дьоҥҥо биһирэбил баара буоллар, үлэ өссө күүскэ барыа этэ диэн эттилэр. Волонтердартан аҥардастыы көмө эрэ ылар тутаҕын, кинилэри эмиэ өйөбүллээх буолуохтаахтар.