Волонтердар — абыраллаах дьон

Аммаҕа буола турар успуорт адаптивнай көрүҥнэрин спартакиадатыгар саамай абыраллаах дьонунан волонтердар буолаллар. Салайааччы Саргылаана Неустроева бэлиэтииринэн, суолталаах тэрээһиҥҥэ 100 волонтер үлэлиир.

— Бу олус наадалаах үлэ көрүҥэр баҕалаах дьон сайаапкаларын ыам ыйын бүтүүтүгэр диэри хомуйбуппут. 16 саастарыттан 60 саастарын ааспыт дьон араас хайысханан үлэлииллэр. Волонтердарбытын икки күн анаан үөрэппиппит. Доруобуйаларынан хааччахтаах дьону кытта үлэлиир буолан, эппиэтинэс олус үрдүк. Ол курдук, 1-кы көмөнү оҥорууга волонтердарбыт бары үөрүйэхтэр. Бу маннык тэрээһиннэргэ уопуттаах лектор Казахстан Өрөспүүбүлүкэтиттэн тиийэ куйаар ситиминэн тахсан үөрэппитэ.
2019 сыллаахха улууспутугар спортивнай оонньуулары ыыппыт буолан, волонтерскай хамсааһыҥҥа уопуттаахпыт улаханнык көмөлөстө. Онно үлэлээбит 15 сүрүн волонтер 85 саҥа дьону ыйан-кэрдэн биэрэ сылдьар буолан, салайааччыларга улахан өйөбүлү оҥороллор. Быйыл Ил Дархан 1 мөл. 865 тыһ. солкуобай граныгар кыайыыбыт анал көстүүм-пуорманы тэҥэ, босхо аһылыкка, үлэбитигэр наадалаах тэриллэри ылыыга улахан өйөбүлүнэн буолла. Ыстааппыт Ольга Иванова-Сидоркевич аатынан айар-сайдыы киинигэр баар. Онно волонтердар үлэлэрин кэнниттэн сынньанар усулуобуйалара барыта баар. Биир да күрэхтэһии волонтера суох барбат. 6 көрүҥҥэ барытыгар волонтер көрдөөбүттэрэ. Холобура, олорон эрэ волейболга — 21, теннискэ — 12, голболга — 9 волонтер үлэлиир. Хас биирдии хамыыһыйа барыта волонтердаах. Ол курдук, хамыыһыйа аайы 7-лии киһиэхэ тиийэ көмөлөһөөччүлээхтэр. Биир киһи күнү быһа сылдьыбат, кэмиттэн кэмигэр солбуйсан, уларытан иһэбит. Онон дьоммут холкутук үлэлииллэр, — диэн Амма улууһун муниципальнай тэриллиитин ыччат уонна социальнай боппуруостарга управлениетын салайааччыта Саргылаана Неустроева санаатын үллэһиннэ.

Кини 2019 сыллаахха волонтердары салайбыт улахан уопуттаах салайааччы буолан, волонтердар олус көхтөөхтүк үлэлииллэр. Кырдьык да, абыраллаах дьон кинилэр!