«Время чудес» Саҥа дьыллааҕы аахсыйаҕа кыттыс, аккырыыкката ыыт

 Саха сирин олохтоохторо чугас дьонноругар ахсынньы 4 күнүттэн Саҥа дьылынан эҕэрдэ аккырыыккаларын босхо ыытыахтарын сөп. Аахсыйа 2021 сылтан «Мин докумуоннарым» киин тэрийиитинэн ыытыллар.

Маннык эҕэрдэ киһиэхэ ураты истиҥинэн, сылааһынан илгийэр. Итинник истиҥ эҕэрдэни төлөпүөнүнэн да, көмпүүтэринэн да тиэрдибэккин диэн «Мин докумуоннарым» кииҥҥэ этэллэр.

Аахсыйа төрдүс төгүлүн ыытыллар, бу тэриллибит кэмин устатыгар дойду үрдүнэн уопсайа 15 000 аккырыыкка ыытыллыбыт. Быйыл тираж 3000.

Саҥа дьыллааҕы үөрүү-көтүү дьоҥҥо-сэргэҕэ «Алмаасэргиэнбаан», «Почта России» УФПС уонна «Ахсым» рекламнай-полиграфическай хампаанньа көмөлөрүнэн тиэрдиллэр.

Тэрийээччилэр этэллэринэн, чугас киһини эҕэрдэлиир судургу — аахсыйа ыытыллар пуунугар кэлэҕин, аккырыыккаҕа эҕэрдэҕин суруйаҕын уонна Арассыыйа буостата анаан туруорбут дьааһыгар угаҕын. Аккырыыкканы дойду хайа баҕарар эрэгийиэнигэр босхо ыытаҕын. Аккырыыкканы толоруу быраабылатын умнумаҥ:

1. Ыытааччы уонна аккырыыкканы тутар киһи нэһилиэнньэлээх пуунун индексин ыйаҕын;

2. Хайа да өртүттэн аадырыс чуолкай буолуохтаах.

Аахсыйа ыытыллар сирдэрэ:

-«Мои Документы», Аммосов уул., 18

-«Алмазэргиэнбанк» АО, Ленин пр. 10

Аккырыыккалары РФ иһигэр ыытаҕыт.

СӨ Ил Дархан уонна Бырабыыталыстыба пресс-сулууспата