«Время героев» бырагыраама кыттыылааҕа оскуола дириэктэринэн үлэлиир

Бойобуой дьайыы бэтэрээнэ үлэтигэр сүрүн болҕомотун үөрэх хаачыстыбатыгар, үөрэнээччилэри  патриотическай иитиигэ уурар.

Иосиф Слепцов 2022 сыллаахха кулун тутарга  баҕа өттүнэн байыаннай дьайыыга барбыта.  Балтараа сыл  «Барс-1» этэрээккэ сулууспалаабыта, «За храбрость» мэтээлинэн наҕараадаламмыта.

«Дойдуга ыарахан балаһыанньа үөскээбитигэр мин таах олорор санаам суоҕа.   Байыаннай дьайыы кыттыылаахтарын «Время героев» бырагыраамаларын туһунан  демобилизацияланан баран,  «Бэс Чагда» санаторийга сытан билбитим. Докумуоннарбын туттаран баран,  анкетированиены, тестированиены ааспытым. Куонкурус түмүгүнэн бырагыраама кыттыылааҕа буолбутум.  Ил Дархан  Айсен Николаев  көҕүлээбит  «Якутия – Земля героев» бырагырааматын сөптөөҕүнэн ааҕабын.  Бу бырагыраама «Время героев» бырайыак салгыытынан буолла», – диэн бэлиэтээтэ  Иосиф Слепцов.

Иосиф Слепцов  идэтинэн  юрист, бу иннинэ Автодорожнай уонна  Гагаринскай уокуруктарга, Дьокуускай куорат  Градостроительствотын  уонна тырааныспар  инфраструктуратын департаменыгар, 39 нүөмэрдээх оскуола дириэктэрин солбуйааччытынан үлэлээбитэ.

Санатан эттэххэ, Ил Дархан Айсен Николаев Ил Түмэҥҥэ Анал этиитигэр  байыаннай дьайыы кыттыылаахтара эйэлээх олоххо төннүүлэригэр өйөбүлү оҥорууну биир сүрүн соругунан ааттаабыта.