«Время смыслов» аныгы плакатнай ускуустуба куонкуруһун иккис сезона аһылынна

Дьокуускайга РФ бырабыыталыстыбатын бэрэссэдээтэлин солбуйааччыта — Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев Арассыыйа Дьоруойа Сергей Ефремов аатынан «Время смыслов» диэн аныгы плакатнай ускуустуба куонкуруһун иккис сезонун аста.

Куонкурус «Тигр» Добровольческай этэрээт уонна «Судьба» сурунаал арт-бырайыак көҕүлээһиннэринэн, Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлин аппараатын уонна «Социальнай көҕүлээһиннэр сайдыыларын пуондатын» НКО өйөбүллэринэн ыытыллар. Күрэхтэһиини «Форвард» АСК тэрийэр. Күрэхтэһии номоххо киирбит «Тигр» этэрээт хамандыыра, Приморскай кыраай ис бэлиитикэҕэ вице-губернатора, Курскай уобалаһы босхолооһун кэмигэр өлбүт Арассыыйа Дьоруойа Сергей Викторович Ефремов аатын сүгэр.

Дьүүллүүр сүбэҕэ култуура, бэлиитикэ уонна медиа эйгэтин биллэр-көстөр дьоно киирэллэр. Дьүүллүүр сүбэни аан дойдуга биллэр фантаст-суруйааччы, РФ Уопсастыбаннай палаататын чилиэнэ Сергей Лукьяненко салайар.

Бастакы куонкуруска Арассыыйа 84 эрэгийиэниттэн, атын дойдулартан 3200 кэриҥэ үлэ киирбитэ. 13 анал аакка кыайыылаахтарынан 39 киһи буолбута, өссө 20 киһи “Арассыыйа эрэллэрэ” категорияҕа бастаабыта.

Билигин быыстапка Дьокуускайга баар – 30 бастыҥ үлэ көрдөрүүгэ турар. Юрий Трутнев сүрүн болҕомтотун Илья Стойков “Враг не пройдет” үлэтигэр уурда.

Куонкурус иккис сезона хас да саҥа анал ааттары киллэрдэ: “Дети и Киберугрозы”, “Обложки школьных тетрадей”, “Монументальный плакат” эбэтэр куораты киэргэтэр мураллар. Ону кытта айар үлэ арыллар олох туспа хайысхатыгар – видеоплакаттарга баар буолуоҕа,  диэн иһитиннэрэр Ил Дархан, бырабыыталыстыба пресс-сулууспата.