ВШИМ эспиэрдэрэ Ньурба улууһугар стратегическай сессияны ыыттылар

Саха Өрөспүүбүлүкэтин Ил Дарханын иһинэн Инновационнай менеджмент үрдүкү оскуолатын  исписэлиистэрэ Ньурба улууһун дьаһалтатын бэрэстэбиитэллэригэр икки күннээх стратегическай сессияны ыыттылар. Бу туһунан www.sakha.gov.ru иһитиннэрэр.

Кыттааччылар сири-уоту сайыннарыы практическай соруктарын быһаарарга нейросеть технологияларын кыахтарын кытта билистилэр. Үлэ кэмигэр кинилэр Оҥоһуу өйгө (ИИ) ыйытыылары туруорарга уонна ылыллыбыт дааннайдары бырайыактары былаанныырга туһанарга үөрэннилэр.

«Мин санаабар, сэминээр кэмигэр ылыллыбыт билиилэр салайааччыга да, исписэлиискэ да, бастатан туран, күрэстэһэр кыахтаах буолалларыгар уонна билиҥҥи кэм сүрүн хайысхаларын (трендтэрин) билэ сылдьалларыгар наадалаахтар. Ылыллыбыт билиилэр бырайыактары наардыырга, информацияны түмэргэ уонна чинчийэргэ, ону тэҥэ билиһиннэрэр матырыйааллары бэлэмнииргэ кыах биэриэхтэрэ», – диэн Ньурба улууһун баһылыгын экэниэмикэҕэ уонна үпкэ-харчыга солбуйааччыта Эдуард Мярикянов бэлиэтээтэ.

Сессия түмүгүнэн улууһу сайыннарар бырайыактарга этиилэр бэлэмнэннилэр уонна көдьүүстэрин сыаналыыр көрдөрүүлэр быһаарылыннылар. Тэрийээччилэр маннык үлэни ыытыы уопута өрөспүүбүлүкэ атын муниципальнай тэриллиилэригэр эмиэ туһалаах буолуо диэн эрэллээхтэр.