Вячеслав Емельянов: «Улуу Кыайыы 80 сылынан мэтээли туттарыы — улахан чиэс»

СӨ ОДьКХ уонна энергетикатын миниистирэ Вячеслав Емельянов Аҕа дойду уоттаах сэриитигэр Улуу Кыайыы 80 сылынан мэтээллэри туттарда.

Бу үөрүүлээх уонна долгутуулаах тэрээһин Томпо улууһугар Бырабыыталыстыба отчуотун иитинэн буолла.

«Улуу Кыайыы 80 сылынан мэтээллэри туттарар улахан чиэскэ тигистим. Аҕа дойду кырыктаах сэриитин сылларын бу сүгүрүйэр ытык кырдьаҕастарбыт барахсаттар хайдахтаах күүстээх, самныбат санааларынан, олоҕу муҥура суох таптыылларынан тулуйбуттара сөхтөрөр«, — диэн бэлиэтиир миниистир.

Вячеслав Емельянов Улуу Кыайыы 80 сылынан мэтээллэрин тыыл бэтэрээннэригэр: Кириэс Халдьаайы олохтооҕор Жегусова Ирина Прокопьевнаҕа, Кэскилгэ олорор Александрова Мария Николаевнаҕа, Тополинай ытык кырдьаҕаһыгар Старостина Мария Николаевнаҕа, Хаандыгаҕа олорор Авелова Анфиса Павловнаҕа, Прокопьева Надежда Осиповнаҕа, Токарева Валентина Архиповнаҕа, Гердун Людмила Афанасьевнаҕа, Семенова Вера Константиновнаҕа уонна Матвеева Прасковья Устиновнаҕа  туттарда.

СӨ ОДьКХ уонна энергетикатын министиэристибэтин пресс-сулууспата

Хаартыскалар: СӨ ОДьКХ уонна энергетикатын министиэристибэтиттэн