Вячеслав Штыров Айсен Николаев быыбарга турунарын өйөөтө

Ил Дархан Айсен Николаев Москваҕа СӨ судаарыстыбаннай сүбэһитэ Вячеслав Штыровы кытта көрүстэ. Кинилэр бу көрсүһүүгэ креативнай индустрия сайдыытын быһаарыстылар.

— Саха сирин креативнай индустриятыгар 45 тыһыынчаттан тахса киһи үлэлиир. Бу салаа сайдыытыгар оҕолор цифровой үөрэхтэниилэрин кииннэрин тэрийэбит, инфраструктураны кэҥэтэбит. “Үлэ кыбаартала” креативнай кластеры арыйыы улахан суолталаах түгэн буолла. Кластерга анимация, киинэ, медиа, дизайн, о.д.а. сайдарыгар бары усулуобуйа баар буолла. Саха сирэ 2022 сыллаахха “Креативный регион года” номинацияҕа кыайыыта биһиги үлэбит үчүгэй түмүктэрин көрдөрөр, — диэн Айсен Николаев эттэ.

Вячеслав Штыров бу салаа балысханнык сайдар кыахтааҕын бэлиэтээтэ.

— Чахчы, биһиги үгэстэргэ, култураҕа тирэҕирэн, киинэ, ойуулуур-дьүһүннүүр ускуустуба, IT-технология өттүгэр айар-тутар, сайдар кыахтаахпыт. Саха сирэ бу хайысханан ситиһиилээхтик баран иһэр, — диэн судаарыстыбаннай сүбэһит эттэ.

Ону тэҥэ, патриотическай иитии тиэмэтин эмиэ таарыйдылар. Кадетскай оскуолалары сайыннарыы, алмаас бырамыысыланнаһын, инвестициялары киллэрии, о.д.а. боппуруостары кэпсэттилэр.

— Кэпсэппит боппуруостарбыт чугастааҕы 5 сыл соруктарын таарыйаллар. Маннык бөдөҥ салаалары, хайысхалары сайыннарыы чуолкай былааннааһыны эрэйэр. Айсен Сергеевич Ил Дархан быыбарыгар киирсэрин үөрэ иһиттим. Кини эдэрдии эрчимнээх, иккис өттүнэн, улахан уопуттаах салайааччы, — диэн Вячеслав Анатольевич бэлиэтээтэ.

Ил Дархан, бырабыыталыстыба дьаһалтатын пресс-сулууспата.