Вячеслав Васильев сиэттэригэр анаабыт оҥоһуга

Бу күннэргэ Саха сирин талааннаах дьоно хаартан-муустан кэлэн иһэр саргылаах Саҥа дьылы көрсө араас оҥоһуктары оҥордулар.

Бүгүн Мэҥэ Хаҥалас улууһун Хочо бөһүөлэгин олохтооҕо, биэнсийэлээх, кэтэх хаһаайыстыбатынан дьарыктанар Вячеслав Васильев Илиҥҥи халандаарынан  кэлэн иһэр Ат сылын көрсө оҥорбут оҥоһуга үгүс дьон кэрэхсэбилин ылла.

“Маннык талааннаах дьоҥҥо граннары, бириэмийэлэри аныахха наада”, — дэспиттэр этэ кэрэхсээбит дьон.

Вячеслав Васильевич биэнсийэҕэ тахсыан иннинэ хомунаалынай хаһаайыстыба эйгэтигэр үтүө суобастаахтык үлэлээбитэ. Бииргэ төрөөбүттэрин курдук оҕо эрдэҕиттэн уруһуйдуур дьоҕурдаах. Үс оҕолоох ыал аҕата аны сиэннэрин үөрдээри сыл аайы араас оҥоһуктары оҥорон дьиэтин таһыгар туруорар идэлээх.

— Бэҕэһээ кэргэним оҥоһугун аймахтарбытыгар ыыппыппыт. Сири-Сибиири бараабыт дии. Өрөбүллэргэ сиэттэрбит уонна балтым оҕолоро кэлэллэр. Кинилэр эмиэ: «Эбээ, эһээ дииллэр». Ол иһин кинилэргэ анаан оҥорбута, — диир кэргэнэ Иустинья Прокопьевна.

Дьэ, онон II Наахара нэһилиэгин Хочо бөһ. олохтооҕун Вячеслав Васильев Саҥа дьыллааҕы айымньытын көрүҥ, кэрэхсээҥ!

Хаартыска: И.Васильева ыытта.