Вывескалар, докумуоннар икки тылынан суруллуута чуолкайданна

Ил Түмэн онус ыҥырыылаах пленарнай мунньаҕар СӨ Тыл туһунан сокуоҥҥа чуолкайдыыр уларытыылары киллэриигэ сокуон барыла ылылынна.

Сокуон барылынан «Саха Өрөспүүбүлүкэтигэр тыл туһунан» 1992 сыл алтынньы 16 күнүнээҕи сокуонугар чуолкайдыыр уларытыылар киирэллэр. Арассыыйа Федерациятын гражданинын  лиичинэһин бигэргэтэр докумуоннар, гражданскай турук аахталарын суруйуулара итиэннэ үлэ, ону кытта үлэ ыстааһын туһунан иһитиннэриилээх докумуоннарга, ааты иҥэрии национальнай үгэстэрин  аахсан туран, Арассыыйа Федерациятын судаарыстыбаннай тылынан итиэннэ саха тылынан суруллар буолаллар.

Судаарыстыбаннай уорганнар, тэрилтэлэр, предприятиелар уонна учреждениелар ааттара баар докумуоннар (бланкалар, бэчээттэр, штампалар, штемпеллэр) тиэкистэрэ, вывескалар саха тылынан уонна нуучча тылынан суруллуохтара. Оттон Хоту дойду төрүт олохтоох аҕыйах ахсааннаах норуоттара түөлбэлээн олорор сирдэригэр олохтоох официальнай тылларынан суруллар буолуохтара. Докумуоннар уонна вывескалар тиэкистэрин суруйуу Арассыыйа Федерациятын сокуоннарыгар сөп түбэһиннэрэн оҥоһуллуохтара. Сокуон барыла бүтэһиктээх ааҕыыга ылылынна.