«Вызов Севера” турнирга чөмпүйүөн үс курун оонньотуохтара

Ахсынньы 3 күнүгэр «Панчер» спортивнай кулуупка «Вызов Севера» турнир кыттыылаахтарыгар медиа-эрчиллии буолла.

Бу быйылгы сыллааҕы бокс сүрүн күрэхтэһиитин иннинээҕи биир саамай наадалаах түһүмэҕинэн буолар.

Ол күн ураты курдар көрдөрүүгэ таҕыстылар: бастакыны “Азия чөмпүйүөнэ” титул иһин киирсии кыайыылааҕар туттарыахтара, онно «Полярнай бөрө» Михаил Варламов уонна Таиланд Королевствотын хотторууну көрсүбэтэх Физит Паочантуэк кыттыахтара. Иккис кур чөмпүйүөннэр чөмпүйүөннэригэр –Евгений Рязанскай салалтатынан Aurora Siberica ювелирнай брендэ оҥорбут кура саха успуордун сулустара Кай Адамов – Алексей Уваровскай киирсиилэрин кыайыылааҕар бэриллиэҕэ. Үһүс кур — профессионаллар ортолоругар Арассыыйа чөмпүйүөнэ ааты ылбыкка туттарыллыаҕа. Онно Саха сириттэн Назар Андреев уонна Челябинскай боксера Александр Сечко киирсиэхтэрэ.

Ахсынньы 5 күнүгэр күрэхтэһии кыттыылаахтарын М.К. Аммосов аатынан КФЕН медиа-ыйааһыннаныыга кэтэһэллэр. Онтон ахсынньы 6 күнүгэр киэһэ 17:00 чаастан «Триумф» спортивнай кииҥҥэ бокс сүрүн киэһэтэ буолуоҕа. Билиэт Ykt платформа нөҥүө 500 солкуобайтан саҕалаан атыыланар. Бу туһунан Sportyakutia.ru иһитиннэрэр.