WhatsApp* хааччахтааһыннарын туһунан туох биллэрий

Арассыыйа олохтоохторо бу күннэргэ WhatsApp* мессенджер үлэтигэр мөлтөөһүннэри бэлиэтииллэр (*Арассыыйаҕа экстремисткэйинэн билиниллибит уонна бобуллубут Meta корпорация бас билиитэ).

Бүтэһик хас да сууккаҕа сүүһүнэн үҥсүү киирбит. Ону кытта Роскомнадзор, өскөтүн мессенджер Арассыыйа сокуонун ирдэбиллэрин толорбот буоллаҕына, толору бобуллуон сөбүн туһунан сэрэтэр. Бу ирдэбиллэр хас да сыллааҕыта этиллибиттэрэ эрээри, WhatsApp кэпсэтиигэ киирбэтэҕэ.

Туһанааччылар сэтиннби ыйыттан WhatsApp үлэтигэр тэхиниичэскэй кыһалҕалары көрүстүлэр. Араас интэриниэт-сервистэр WhatsApp үлэтигэр кэһиллии тахсыбытын бэлиэтиир. Холобур, «Сбой.рф» саайтка сэтинньи 30 күнүгэр 541 үҥсэрии киирбитэ бэлиэтэнэр, ахсынньы 1 күнүгэр балаһыанньа улаханнык уларыйбата. Ордук элбэх үҥсүү Москваттан киирэр — 34%. Downdetector сервискэ туһанааччылар бэлиэтээбит 243 мөлтөөһүннэрин туһунан дааннайдар бааллар. Ол эрээри, ордук элбэх мөлтөөһүн сэтинньи 28 күнүгэр бэлиэтэммит. «Сбой.рф» 5,5 тыһыынча кэриҥэ үҥсүү киирбитин көрдөрбүтэ. Downdetector портаал дааннайдарынан, үксүн иһитиннэриилэр кэлбэт буолаллар, ону тэҥэ суруктар, ол иһигэр хаартыскалаах, видеолаах уонна аудиолаах суруктар бытааннык ыытыллаллар.

Үҥсүү сорҕото веб-версия мөлтөөһүнүгэр уонна мессенджер бэйэтин үлэтин кэһиллиитигэр сыһыаннаахтар. Ордук элбэх үҥсүү Иваново уобалаһыттан киирбит, кини кэнниттэн Ямал-Ненец автономнай уокуруга, Москва уонна Кострома уобаластара, ону тэҥэ Псков уобалаһа кэлэллэр.

Туһанааччылар маннык кыһалҕалары бэлиэтииллэр:

• суруктар уһуннук ыытыллаллар; 
• медиафайллар (хаартыска, видео) бытааннык хачайданаллар; 
• сорох түгэннэргэ мессенджер отой да үлэлээбэт буолар.

Роскомнадзорга иһитиннэрбиттэринэн, WhatsApp мессенджер Арассыыйаҕа теракт оҥорууга уонна онно кыттааччылары угуйарга, ону тэҥэ түөкүттэр албастарыгар уонна атын буруйу оҥорорго туһаныллар. Мессенджер үлэтин хааччахтааһын «буруйу оҥорооччулары утары охсуһарга» наада. Өскөтүн WhatsApp бобуута олоххо киирдэҕинэ, туһанааччылар атын мессенджери көрдүүргэ тиийиэхтэрэ. Ырыынакка элбэх мессенджер баар, олор истэригэр дойдуга оҥоһуллубуттар эмиэ. Холобур, Раевскай aif.ru-га кэпсэтиитигэр MAX мессенджери бэлиэтиир. Ол гынан баран, платформаны талыы кини тэхиниичэскэй уратыларыттан эрэ буолбакка, киһи билэр дьоно ханнык мессенджеринэн туһаналларыттан эмиэ тутулуктаах.