«ЯК-14» научнай-практическай кэмпириэнсийэҕэ көрдөрүлүннэ

СӨ Ил Дархана Айсен Николаев, РФ Оборуонатын миниистирин солбуйааччы Александр Санчигы кытта, РФ Сэбилэниилээх күүстэрин научнай-практическай кэмпириэнсийэтигэр көрдөрүллүбүт аныгы робот-тиэхиньикэлэри уонна пилота суох системалары билистэ. Быыстапкаҕа Саха сиригэр оҥоһуллубут, байыаннай дьайыыларга туттуллар «ЯК-14» пилота суох платформа көрдөрүүгэ турда.

«Бу тэрээһин саҥа технологиялар аармыйабыт кыаҕын төһө күүһүрдэрин уонна бу хайысха төһө түргэнник сайдарын илэ көрдөрдө. Оборуона министиэристибэтин салайааччыларыттан Саха сирэ оператордары бэлэмнээһин хаачыстыбатынан уонна робот-тиэхиньикэлэри оҥоруунан бастыҥ эрэгийиэннэр ахсааннарыгар киирэрин истэн киэн туттабын. Тэрээһиҥҥэ көрдөрүллүбүт, өрөспүүбүлүкэ өйөбүлүнэн оҥоһуллубут уонна байыаннай дьайыыларга ситиһиилээхтик туттулла сылдьар «ЯК-14» платформа биһиги үлэбит көдьүүстээҕин бигэргэтэр», — диэн  Ил Дархан «МАХ» мессенджергэ ханаалыгар суруйда.

Айсен Николаев эрэгийиэн бэйэтин инжиниринг-үөрүйэхтэрин салгыы сайыннарыаҕын  бэлиэтээтэ. Кини санаттаҕына, Дьокуускайга саҥа пилота суох комплекстары оҥоруунан уонна таһаарыынан дьарыктанар «Полярный» диэн научнай-оҥорон таһаарар киин үлэтин саҕалаата.

«Хас биирдии саҥа бырайыак дьон Саха сирэ дойдуга дьиҥнээхтик туһалааҕын уонна инники кирбиигэ наадалааҕын итэҕэйэрин күүһүрдэр. Биһиги иннибит диэки баран иһэбит, аармыйаны өйүүбүт, технологиялары сайыннарабыт уонна Арассыыйа күүһүгэр биир санаалаах эрэлбитин бөҕөргөтөбүт. Бу эрэл дьону сомоҕолуур уонна дойдубут булгуччу ситиһиллиэхтээх Кыайыыга эрэллээхтик баран иһэригэр көмөлөһөр», — диэн Николаев бэлиэтээтэ.