«Якутия» атомоход ахсынньыга бэлэм буолуо

Бэрэсидьиэн Владимир Путин «Чукотка» атомнай ледоколу ууга түһэрии сиэрин-туомун кэмигэр Арассыыйаҕа саамай улахан ледокольнай флот баар диэн туран, ахсынньыга «Якутия» атомоход былааҕа күөрэйиэҕэ диэн эрэнэрин биллэрдэ.

— Арассыыйаҕа аан дойдуга саамай улахан ледокольнай флот баар. Арассыыйа хотугу дойду буолан, ити өйдөнөр. Биһиэхэ 34 дизельнэй, 7 атомнай  ледокол баар. Өссө «Якутия», «Чукотка», «Ленинград», «Сталинград» баар буолуохтара, оччоҕо 11 атомнай ледокол буолар. Ахсынньыга «Якутия» атомоход былааҕа күөрэйэн, Арассыыйа флотун састаабыгар киирэригэр эрэнэбин, — диэн кини эттэ.

Бэрэсидьиэн маннык модун суудуналары оҥоруу Арассыыйа индустриальнай, научнай, технологическай кыаҕын күүһүрдүү буоларын тоһоҕолоон бэлиэтээтэ. Хотугу муора суолунан таһаҕаһы тиэйиини элбэтэргэ бу олус суолталаах. Былырыын бу суолунан 36 мөлүйүөн туоннаны таһар эбит буоллахтарына, быйыл 37,6 мөлүйүөн туоннаны, 2030 сылга 100-тэн тахса мөлүйүөн туоннаны таһыахтара.

Бырамыысыланнас, атыы-эргиэн миниистирэ Антон Алиханов «Якутия» ледокол 95 бырыһыан бэлэм буолла диэн бэрэсидьиэҥҥэ отчуоттаата.

Саҥа ледоколлары «Росатом» корпорация сакааһынан, Балтийскай собуокка оҥороллор. Маннык модун суудуналар чычаас да, дириҥ да ууларга үлэлиир, 3 миэтэрэ халыҥнаах мууһу алдьатан барар кыахтаахтар. 

Ил Дархан, бырабыыталыстыба пресс-сулууспата.