«Якутия» авиахампаанньа Дьокуускай – Харбин – Дьокуускай хайысханан сырыы 20 сылын туолуутун бэлиэтиир

«Якутия» авиахампаанньа Дьокуускай – Харбин – Дьокуускай хайысханан бастакы аан дойдутааҕы пассажирскай рейсин арыйбыта 20 сылын бэлиэтиир. Чопчу сүүрбэ сыл анараа өттүгэр, бу сыл  алтынньы 20 күнүгэр, Саха сирин олохтоохторугар саҥа туристическай кэскили арыйбыт эрэ буолбакка, Саха сирэ уонна Кытай Норуодунай Өрөспүүбүлүкэтин ыккардыгар уһун болдьохтоох атыы-эргиэн, экэнэмиичэскэй уонна култуурунай бииргэ үлэлээһиҥҥэ бигэ акылааты уурбут көтүү буолбута.

Ту-154 сөмөлүөтүнэн толоруллубут бастакы рейс СӨ Бырабыыталыстыбатын уонна Хэйлунцзян провинциятын Норуодунай бырабыыталыстыбатын ыккардыларыгар бииргэ үлэлээһин туһунан сөбүлэһии олоххо киириитинэн буолбута. Сөмөлүөт иһигэр судаарыстыбаннай диэйэтэллэр, биисинэс, туризм эйгэтин уонна маассабай иһитиннэрэр-биллэрэр эйгэ  бэрэстэбиитэллэрэ киирбит дэлэгээссийэ баара. Ааспыт 20 сыл устата Дьокуускай – Харбин маршрута ирдэнэр уонна стратегическай суолталаах буоларын дакаастаата.

Бүгүҥҥү күҥҥэ «Якутия» авиахампаанньа бу хайысханан бигэ уонна табыгастаах сырыыны хааччыйар, Sukhoi Superjet 100 сөмөлүөтүнэн нэдиэлэҕэ иккитэ рейс оҥоһуллар: Дьокуускайтан бэнидиэнньиктэргэ уонна чэппиэрдэргэ көтөр, оттон Харбинтан оптуорунньуктарга уонна бээтинсэлэргэ төннөр.

2024 сылга 10 687 пассажир, оттон 2025 сыл 9 ыйын түмүгүнэн 8 561 пассажир көппүт. Дьокуускай уонна Харбин ыккардыларынааҕы салгынынан таһыы сыл аайы бигэтик улаатара бэлиэтэнэр. Маршруту хааччыйыыга 103-кэ диэри пассажир киирэр аныгы Sukhoi Superjet 100 лайнера туттуллар. Авиахампаанньа сыанаҕа араас ньыманы туһанар, аахсыйалары ыытар. Рейс пассажирдарыгар  эбии өҥөлөр бааллар: багаас уонна илии сүгэһэрин эбии миэстэтин атыылаһыы, таһаҕас ыытыыта уонна атын да өҥөлөр. Бу өҥөлөрү атыы официальнай ханаалларын нөҥүө эрдэттэн сакаастыахха сөп. Дьокуускай – Харбин маршрутун аныгы тырааныспар ситимигэр ураты суолтата – Азия биир саамай бөдөҥ уонна технологичнай Харбин аан дойдутааҕы аэропордугар тахсарыгар сытар. Бу  Дьокуускайтан кэлбит пассажирдарга ураты логистическай кыахтары биэрэр. Харбин аэропордуттан Кытай уонна Соҕуруулуу-Илин Азия сүрүн куораттарыгар (Пекин, Шанхай, Гуанчжоу, Сиань, Бангкок, Сингапур, Сеул, Токио), ону таһынан Европа, Хотугу Америка уонна Австралия дойдуларыгар тиийэ көтөр рейстэр бааллар. Пассажирдар Харбины табыгастаах уонна көдьүүстээх атын рейскэ олорор быһыытынан туһанан, уустук маршруттары табыгастаахтык былаанныахтарын сөп.

Бу сыл балаҕан ыйын 15 күнүттэн Кытайга дойду гражданнарыгар визата суох сылдьыы эрэсиимэ киирбитэ. РФ Бэрэсидьиэнэ Владимир Путин быһаарыытынан, Кытайтан кэлэр туристарга хардарыта дьаһал үлэлиирэ ыытылла турар. Бу дьаһал Арассыыйа уонна Кытай ыккардыларынааҕы гуманитарнай уонна экэнэмиичэскэй ситимнэргэ үтүө дьайыыны оҥоруоҕа. Дьокуускай – Харбин маршрута икки өрүттээх ситими бөҕөргөтүүгэ сүрүн оруолу толорор. Саха сирин олохтоохторугар Харбин уонна Хэйлунцзян провинцията билиини-көрүүнү кэҥэтэр, сынньалаҥ туризмыгар, ону тэҥэ мэдииссинэ өҥөтүн туһанарга табыгастаах хайысханан буолар.

Кытай ураты култуурата, кэрэ айылҕата уонна сайдыылаах инфраструктурата араас хайысхалаах айанньыттары тардар. Дьокуускай – Харбин маршрутун сүүрбэ сыллаах ситиһиилээх историята – көдьүүстээх уонна уһун болдьохтоох аан дойдутааҕы бииргэ үлэлээһин чаҕылхай холобурунан буолар.