Борокуруор ирдэбилинэн «Якутия» ФАПК үлэһиттэригэр 8,2 мөл. солк. тахса суумалаах хамнас төлөннө

СӨ Борокуруора Максим Попов сорудаҕынан, өрөспүүбүлүкэ борокуратууратын аппараата үлэ быраабын тутуһуу боппуруостарыгар «Якутия» ФАПК үлэһиттэрин  кытта кэпсэттэ.

Силиэстийэҕэ быһаарыллыбытынан, акционернай уопсастыба 189 үлэһиккэ 8,2 мөл. солкуобайтан тахса суумалаах хамнаска иэстээҕэ биллибит. Бу туһунан СӨ Бороркуратуурата иһитиннэрэр. Гражданнар кэһиллибит бырааптарын көмүскүүр сыалтан борокуратуура уопсастыба генеральнай дириэктэригэр этии киллэрдэ. Тэрилтэҕэ сыһыаннаан РФ Административнай быраабы кэһии туһунан кодексатын 5.27 ыстатыйатын 6-с чааһынан (хамнаһы бигэргэтиллибит болдьоҕор төлөөбөт буолуу эбэтэр толору төлөөбөт буолуу) административнай быраабы кэһии туһунан дьыаланы көбүттэ. Ылыллыбыт дьаһаллар түмүгэр хамнас иэһэ толору төлөннө, үлэһиттэр бырааптара чөлүгэр түһэрилиннилэр.