“Якутия с тобой” улуустары түмэр

Байыаннай дьайыы саҕаланыаҕыттан “Якутия с тобой” диэн өрөспүүбүлүкэтээҕи ыстаап үлэтин саҕалаабыта. Билигин  ыстаап бэрэссэдээтэлинэн Анна Николаевна Ефимова үлэлиир. Ыстаап үлэтин саҕалыаҕыттан кини волонтерунан киирэн күн бүгүнүгэр диэри кыайыыны уһансыыга үгүс сыратын уурда. Бүгүҥҥү күҥҥэ үлэ-хамнас туһунан Анна Николаевна санаатын үллэһиннэ.

— Волонтердар күүстэринэн, бэйэбит кыахпытынан Кыайыы күнүн көрсө байыастарбытыгар бэлэх оҥорон ыыппыппыт: тактическай панамалары, харысхаллары, болокунуот, маркер, минньигэс ас. Баһыылкабыт бу күннэргэ тиийиэхтээх. Кыайыы параадыгар туттуллуохтаах 100 м уһуннаах, 7,5 м кэтиттээх георгиевскай лиэнтэни кылгас кэм иһигэр сакааһынан тиктибит. Лиэнтэни “Өлбөт үйэлээх полк” диэҥҥэ тутан хаамыахтаахтар. Бу сылга сэттэ туоннаттан тахса гуманитарнай көмөнү ыыттыбыт. Биһиэхэ билигин култуура, мэдиссиинэ кэллиэстэрин уонна АГАТУ устудьуоннара кэлэн көмө бөҕө буола сылдьаллар. Маны сэргэ улуустары кытта ыкса үлэлэһэбит. Ол курдук, Мэҥэ Хаҥалас уонна Уус Алдан улуустара филиал быһыытынан көмөлөһөллөр. Мэҥэ Хаҥаластан Мария Дмитриевна салайааччылаах “Түмэн” түмсүү күүстээхтик үлэлэһэр. Плащ-балааккалары, көстүүмнэри тигэн ыыттылар. Уус Алдантан Валентина Николаевна салайааччылаах түмсүү 55 устуука тепловизоры аҕалан туттарбыта. Гуманитарнай көмө Дьокуускай тэрилтэлэриттэн эмиэ киирэр. Ол курдук, куорат уһуйааннара аһымал кэнсиэр оҥорбуттара. Кинилэргэ улахан махталбытын тиэрдэбит. “Рыболовные сети” диэн аахсыйа тэрийбиппит. Манна элбэх улуус кытынна. Сунтаардар 50‑тан тахса, халымалар 20‑чэ сиэккэни уонна кэбээйилэр, уус алданнар, уус маайалар гуманитарнай көмө аҕалан туттарбыттара. Билигин “Уолаттарбытыгар көмөлөһүөҕүҥ” диэн аахсыйа ыыта сылдьабыт. Өрөспүүбүлүкэ бары олохтоохторун аахсыйаҕа кыттаргытыгар ыҥырабыт. Ол курдук эмп-томп, таҥас-сап, хаһаайыстыбаннай, суунар тэриллэри тутабыт. Аадырыспыт: Дьокуускай куорат Бестужев‑Марлинскай уулуссатын 5‑с №-дээх дьиэтин бастакы куорпуһа.

Сэттэ салаанан үлэлиир Мэҥэ Хаҥалас “Түмэн” түмсүүтэ

Мэҥэ Хаҥаластааҕы “Түмэн” уопсастыбаннай холбоһук салайааччыта Мария Лукина:

— Холбоһук 1993 сыллаахтан үлэлиир. Холбоһукпут иһинэн 39 түмсүү күн бүгүнүгэр диэри үлэлиир. Кинилэр бары салайааччылаахтар. Былааннаах, соруктаах үлэлии олоробут. Байыаннай дьайыы саҕаланыаҕыттан биһиги түмсүүбүт күүс-көмө, өйөбүл буолан бэйэтин үлэтин саҕалаабыта. Ол курдук, аан бастаан ас-таҥас хомуйуутуттан саҕалаабыппыт. 2023 с. улууспут иистэнэр массыыналары биэрэн, олохтоох дьаһалтабыт миэтэрэнэн таҥас атыылаһарбытыгар үп-харчы көрөн, ииспит үлэтин саҕалаабыппыт. Дьэ уонна уолаттарбытыгар таҥас-сап тигэн барбыппыт. Иис сыаҕа диэни тэринэн үлэлээбиппит үһүс сыла буолла. Сэттэ салаанан үлэлии олоробут. Салааларбытын салайар дьоммутун билиһиннэрдэххэ, маннык: блиндажнай чүмэчи — Людмила Гаврильевна Пивоварова, бакыаттаах собо миинэ — Антонина Николаевна Петрова, харысхал — Татьяна Петровна Попова, Роза Константиновна Терентьева, иис сыаҕар “Якутия с тобой” ыстаабы кытта үлэлэһиигэ Дора Ивановна Наумова, “Илии сылааһа” — Арианна Абрамовна Филиппова, маскировкалыыр сиэккэ салаата — Евдокия Петровна Семенова уонна аахсыйалары тэрийии — Людмила Гаврильевна. “Якутия с тобой” ыстаапка туттартаатыбыт. Тыһыынчаттан тахса маскировкалыыр сиэккэ, 400‑тэн тахса блиндажнай чүмэчи, 3000 тахса бакыаттаах собо миинэ, 1600‑тэн тахса харысхал бэлиэлэри оҥордубут. 3000 тахса таҥас-сап тиктибит. Көмөлөрбүтүн Москва, Санкт-Петербург, Доннааҕы Ростов куораттарга баар госпиталларга ыыталаабыппыт. Олохтоох дьаһалтабыт үлэһиттэрэ Виктория Викторовна Федорованы, Жанна Николаевна Тумусованы кытта ыкса ситимнээхтик үлэлиибит. Кинилэр уопсастыбаннай хамсааһыммыт үлэтигэр төһүү күүс буолаллар.

«Волонтердар күүстэринэн, бэйэбит кыахпытынан Кыайыы күнүн көрсө байыастарбытыгар бэлэх оҥорон ыыппыппыт: тактическай панамалары, харысхаллары, болокунуот, маркер, минньигэс ас. Баһыылкабыт бу күннэргэ тиийиэхтээх».

Иистэнньэҥ мүрүлэр

Уус Алдан Мүрү нэһилиэгин “Швейный патриот” биригээдэтин салайааччыта Валентина Николаевна Шадрина:

— Биһиги Уус Алдан улууһугар “Швейный патриот” биригээдэни салайан үлэлэтэбит. Дронтан хаххалыыр суорҕаннары тигиигэ волонтердары түмэн үлэбитин саҕалаабыппыт. Улууспут ыччаттара Тамара Орлова уонна Эдуард Степанов Ил Дархан граныгар кыттыбыттара. Бырайыакпыт кыайыылаах тахсан, 1 мөл. 691 тыһ. солкуобайы ылан, уон иистэнэр массыына атыыласпыппыт.

Бэйэм Мүрү нэһилиэгин олохтооҕобун. Нэһилиэкпитигэр баар балаҕан дьиэҕэ үлэлиир буолан, иистэнэр сыахпыт манна тэриллибитэ. Бырайыак сүрүн сыала — дронтан хаххалыыр 200 суорҕаны тигии. Билигин биригээдэбитигэр 7 дьахтар үлэлиир. С. Н. Босикова, М.М Мырсанова, С. Н. Ушницкая, И. Т. Аргунова, Е. С. Попова, Л. К. Винокурова уонна мин. Матырыйаалларбытын “Сайдам” маҕаһыын нөҥүө соҕурууттан сакаастаан ылабыт, кэлин — Дьокуускайтан. Тигэр таҥас баар кэмигэр иистэнньэҥнэр күн ахсын сарсыарда уонтан киэһэ биэскэ-алтаҕа диэри ньиргиччи тигэллэр. Уопсайа, бу күҥҥэ диэри 121 суорҕаны, дронтан харыстыыр 67 плащ-пончо тиктибит. Тикпит таҥаспыт-саппыт байыаннай дьайыыга тиийбитэ. Бастаан биһиги суорҕаннары эрэ тигэрбит. Уопут атастаһа диэн, Майаҕа тиийэн, кинилэртэн билэн-көрөн плащтары тигэр буолбуппут. Сотору кэминэн улууспут дэлэгээссийэтэ байыаннай дьайыы буола турар сиригэр барыахтаах. Онно тикпит таҥаспытын-саппытын ыытыахпыт. Улууспутуттан байыаннай дьайыыга барар уолаттарбыт кэлэн таҥас-сап ылан, тэринэн бараллар. Түгэнинэн туһанан, иистэнньэҥ волонтер кыргыттарбар махталбын тиэрдэбин. Бу сыллар тухары “Якутия с тобой” салайааччыта Анна Ефимованы кытта ыкса сибээһи тутан үлэлии олоробут. Тикпит таҥаспытын кинилэргэ киллэрэн туттаран иһэбит. Хас биирдиибит, чуолаан ийэлэр, уолаттарбыт тустарыгар ис сүрэхпититтэн кыһаллан тикпит таҥаспыт-саппыт, кыра көмөбүт кыайыыны уһансыыга көмө буолуо диэн эрэнэбит.

ХААРТЫСКАЛАР: “ЯКУТИЯ С ТОБОЙ” ТЭРИЛТЭ АРХЫЫБЫТТАН.