«Якутия, вперед!» каадыр куонкуруһугар 104 финалист талылынна

Саха сиригэр «Якутия, вперед!» диэн өрөспүүбүлүкэтээҕи каадыр куонкуруһа ыытыллар. Салайааччы буолуон баҕарар дьоҥҥо аналлаах куонкурус үрдүк квалификациялаах  каадырдары бэлэмниир сыаллаах.

2024 сылга куонкурус хас да түһүмэҕинэн ыытыллар:

1 түһүмэх — экэниэмикэ салааларынан уонна муниципальнай таһымҥа талыы (муус устар 22 күнүттэн бэс ыйын 13 күнүгэр диэри).

2 түһүмэх — аһаҕас талыы (атырдьах ыйыгар).

3 түһүмэх — финал (алтынньы 3-5 күннэригэр).

Быйыл барыта 627 сайаапка киирбит (былырыын 537 сайаапка этэ). Кинилэртэн 3 киһи байыаннай дьайыыга сылдьарынан, эһиилги финалга быһа киирэллэр.

Финалга муниципальнай таһымҥа кыайбыт 32 киһи уонна 72 аһаҕас талыы кыттыылаахтара киирсиэхтэрэ.

Быйыл финал түһүмэхтэрин ситимниир тиэмэнэн Оҥоһуу өй (искусственный интеллект) буолуоҕа. Киһи уонна технологиялар дьайсыыларын, уопсастыбаҕа, тэрилтэлэргэ дьайыытын үөрэтиэхтэрэ. Маныаха үрдүк таһымнаах эспиэрдэр кэлэн үөрэтиэхтэрэ, тургутуохтара. Кыттааччылар «Саха сирин инникитэ» диэн уруһуйу Оҥоһуу өй көмөтүнэн уруһуйдуохтара. Дьыалабыай оонньуу ыытыллыаҕа.

3 күн устата 104 финалиһы өрөспүүбүлүкэ уонна Арассыыйа эспиэрдэрэ сыаналыахтара, тургутуохтара. Алтынньы 4 күнүгэр Наука Аччыгый академиятыгар Ил Дархан Айсен Николаевы кытта көрсүөхтэрэ.