«Якутия, вперед!» куонкуруска 430 сайаапка киирдэ

Саха сиригэр «Якутия, вперед!» куонкуруска 430 сайаапка киирдэ.

Сайаапкалары Якутиявперед.рф  саайтка атырдьах ыйын 31 күнүгэр диэри тутуохтара. Бу туһунан СӨ Ил Дарханын  уонна Бырабыыталыстыбатын пресс-сулууспата суруйар. Ил Дархан Айсен Николаев бэлиэтээбитинэн, «Якутия, вперед!» куонкурус  хас биирдии кыттааччыга  бэйэтин холоон көрөргө уонна тус кыаҕын үрдэтэргэ көмөлүүр. Куонкурус сыала-соруга  — Саха сирин судаарыстыбаннай уонна муниципальнай былааһын уорганнарыгар, экэниэмикэ уонна социальнай эйгэ салааларыгар каадырдары сүүмэрдээһин.

Куонкурус хас да түһүмэхтэн турар, ыраахтан олорон компетенцияларын көрүүттэн саҕалаан  түмүк тургутууларынан бүтэр, манна хас биирдии кыттааччы салайар дьоҕурун ааһарга тургутуоҕа.

Куонкуруска кыттарга хандьыдааттар тестирование ааһаллар уонна бэйэни билиһиннэрии видео бэлэмниэхтээхтэр. Сыаналааһын  араас салайар соруктары быһаарыыга уонна бөлөҕүнэн сорудахтары толорууга көрүллүөҕэ. Финалистары биллиилээх спикердэри кытта көрсүһүүлэр уонна бырайыактыыр кейстары оҥоруу тургутуу күүтэр. Куонкурус түмүгүнэн бастыҥнарынан билиниллибит 25 финалистары Саха сирин салайар каадырдарын резервэтигэр киллэриэхтэрэ.