“Якутия – Земля героев” каадыр бырагыраамата байыаннай дьайыы кыттыылаахтарыгар саҕаланар  

“Якутия – Земля героев” каадыр бырагырааматын “Быһаччы биэрии” эпииригэр Айсен Николаев иһитиннэрдэ. Бырайыак байыаннай дьайыы кыттыылаахтарын уонна бэтэрээннэрин салайар үлэҕэ кытыннарыыга анаммыт.

Саха сирин баһылыга иһитиннэрбитинэн, бырагыраама хайы-үйэ олунньу 21 күнүттэн саҕаланар. Бэс ыйын саҥатыгар 25 бастакы истээччи сүүмэрдэниэҕэ.

“Бырагыраамаҕа кыттарга байыаннай дьайыыга кыттыбыт үрдүк уонна орто анал үөрэхтээх дьон сайаапка биэриэхтэрэ. Кинилэр үөрэх араас модулун ааһыахтара, ол иһигэр министиэристибэлэргэ, госхампаанньаларга, муниципальнай тэрилтэлэргэ стажировканы ааһыахтара”, — диэтэ Айсен Николаев.

Кини этэринэн, өссө 25 киһини билигин байыаннай дьайыыга сылдьар дьонтон саппааска талыахтара.

“Кинилэр дьиэлэригэр төннөн кэлэн баран үөрэтиини ааһыахтара. Бастакы сүүмэрдээһини ааспатах дьоҥҥо эмиэ кыахтар көрүлүннүлэр. Кинилэр үөрэтэр видеокуурустары көрүөхтэрэ уонна бырагыраама кэлэр сүүмэрдээһинигэр сайаапка биэрэр кыахтаныахтара”, — диэтэ өрөспүүбүлүкэ салайааччыта.

Бырагырааманы үөрэнэн бүтэрбиттэри судаарыстыбаннай уонна муниципальнай уорганнарга салайар үлэҕэ аныахтарын сөп. Ол курдук, өрөспүүбүлүкэ иһигэр үлэлиир тэрилтэлэр бырагырааманы бүтэрбиттэр кинилэр салайар састааптарыгар киирэллэрин утарбаттар.

Бастакы түһүмэххэ анкеталааһыны, тестээһини ааһыыны кытта сибээстээх боппуруостары РФ Бэрэсидьиэнин Дьаһалтатын быһаарыытынан Судаарыстыбаннай сулууспа норуот хаһаайыстыбатын Арассыыйатааҕы академията ыытар.

“Бырагырааманы үрдүк таһымнаахтык ыытыахпыт диэн эрэнэбин. Инники уон сылга олус дьоһун каадырдары бэлэмниибит. Инновационнай менеджмент Үрдүкү оскуолатын базатыгар ыытыллар куурустарыгар үрдүк ирдэбил турда. Курсаннарга настаабынньыктар сыһыарыллыахтара, кинилэргэ өрөспүүбүлүкэ салайааччылара лиэксийэлэри ааҕыахтара. Мин эмиэ кинилэрдиин көрсүһүөҕүм”, — диэтэ Айсен Николаев.

Санаттахха, “Якутия – Земля героев” сүрүн бырагыраамата РФ Бэрэсидьиэнэ Владимир Путин көҕүлээбит “Время героев” федеральнай бырайыакка майгынныыр.

Истээччилэр судаарыстыба  бэлиитикэтин, салайыы аныгы ньымаларын, эрэгийиэн экэниэмикэтин уонна үбүн уо.д.а үөрэтиэхтэрэ.

Модуллар икки ардыларынааҕы кэмҥэ истээччилэр ВШИМ платформатыгар тэйиччиттэн үөрэниэхтэрэ. Кинилэргэ стратегическай сиэссийэлэр, трениннэр, маастар-кылаастар уо.д.а тэриллиэхтэрэ.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата