“Якутлесресурс”: 15 сыл сайдыыга дьулуһан

Саха Өрөспүүбүлүкэтин Бырабыыталыстыбатын Бэрэссэдээтэлэ Е.А.Борисов 2007 сыл ахсынньы 25 күнүнээҕи 1756 №-дээх дьаһалынан урукку лесхозтар уларыта тутуллан, икки тус-туспа тэрилтэҕэ арахсыбыппыт. Мэҥэ Хаҥаласка “Мэҥэ Хаҥаластааҕы  лесничество” бүддьүөт тэрилтэтэ   уонна  “СӨ Центрлес” ГАУ Мэҥэ Хаҥаластааҕы салаата буолбуппут.

Сүрүн хайысхабытынан баһаа­ры умулларыы, тыа баһаарыттан сэрэхтээх буолууну сэрэтэр үлэлэри ыытыы, судаарыстыба ойуурга үлэлэниэхтээх сорудахтарын  толоруу, ону таһынан тэрилтэлэргэ уонна чааһынай ыалларга өҥө оҥоруу: дэлээнэ быһыыта, ойуурдары баһылааһын бырайыага, кумах, гравий карьердарын үлэлэтии, уокка оттор мас бэлэмнээһинэ, пиломатериал эрбэтии, атыылааһын.

Генеральнай дириэктэрбит Андрей Георгиевич Ноговицын урукку лесхоз исписэлиистэрин үксүлэрин илдьэ хаалбыт буолан, олус көдьүүстээхтик үлэтин саҕалаабыта. Ордук тыа баһаарыттан сэрэхтээх буолуу үлэлэрин, баһаары умулларыы, дэлээнэ быһыыта, курдук судаарыстыбаннай сакаас үлэлэрин кыайа-хото туппуппут. Ону таһынан, холобура, Аллараа Бэстээххэ тимир суол баксаалын магистралын тутуутугар ылсан, тырааныспар-логистика киинигэр дэлээнэ быһан, баайын-дуолун сыаналаан, магистральнай учаас­так тухары ойууру баһылааһын бырайыагын оҥорбуппут. Олус элбэх кумах, гравий карьердарыгар учаастак быһыыта ыытыллыбыта. Бырайыактыыр үлэлэр олус тэрээһиннээхтик оҥоһуллубуттара. Саҥа тиэхиньикэ ылыллыбыта.

2012 с. Владимир Михайлович Прокопьев генеральнай дириэк­тэринэн анаммыта, тэрилтэ “Якутлесресурс” СӨ ГАУ диэн аата уларыйбыта. Оттон үлэбит хайысхата оннунан уларыйбакка хаалбыта. Владимир Михайлович үлэлиир кэмигэр тэрилтэ элбэх иэһин саппыта.  Үлэ күөстүү оргуйбута. Кини олус таһаарыылаахтык үлэлээн иһэн, СӨ Судаарыстыбаннай Мунньаҕын (Ил Түмэн) дьокутаатынан талыллыбыта.

2013 с. сэтинньиттэн Альберт Иннокентьевич Ильин генеральнай дириэктэринэн анаммыта. Кини салайар кэмигэр “ГРЭС-2” Дьокуускайтан Табаҕаҕа барар уот ситимин солооһуна  кэрдиллибитэ.

2015 с. генеральнай дириэк­тэринэн анаммыт Вадим Аркадьевич Новиков экэнэмиис үөрэхтээх буолан, оҥорон таһаа­рар-хаһаайыстыбаннай салааны инники күөҥҥэ таһааран, күүскэ үлэлэтэри ситиспитэ. Ол түмүгэр мөлүйүөнүнэн иэһи-күүһү суох оҥорон, тэрилтэбитин барыстаахтык үлэлиир салааҕа таһаарбыта.

2020 с. Джулустан Иванович Хон генеральнай дириэктэринэн  үлэтин саҕалаабыта. Эдэр, кэскиллээх үлэһит 2021 сыл тэрилтэни тиэхиньикэнэн хааччыйан, тыа баһаарын кыайа-хото тутан умулларыы ситиһиллибитэ. Ол курдук, Горнай улууһугар олус улахан баһаардар тураннар, хас да баһаар холбоһон, Бэс Күөлүгэр тула өттүттэн тиийэн кэлбитэ. Бу баһаарга бары өттүнэн, тиэхиньикэнэн күүскэ хааччыллыбыт “Якутлесресурс” үлэһиттэрэ, бөһүөлэккэ олус улахан хоромньу оҥоһуллуохтааҕын, тохтоппуттара. Мэҥэ Хаҥаласка олус киэҥ сиринэн Чурапчыттан ааҥ­наан киирбит аһары улахан баһаары, эмиэ бары баһаары умулларар тиэхиньикэнэн сэбилэммит “Якутлесресурс” үлэһиттэрэ тохтоппуттара, умулларбыттара. Уоту умулларыы манан аҕай дьыала буолбатах: элбэхтик баһаарга сылдьан ханна барбыт сириттэн, үүнэн турар маһын арааһыттан, тыал хайдах, хайа диэки үрэриттэн, халлаан туругуттан олус тутулуктаах. Ону үөрэтэн, мындырдык толкуйдаан, түргэнник, сөптөөхтүк туттан-хаптан эрэ тохтотуллар. Биһиги тэрилтэбит үлэһиттэрин сылын аайы үөрэттэрэр, билигин улахан баһаардары умулларар кыахтанныбыт.

Бу ааһан эрэр 2022 сылга бары филиаллар сөптөөх анал тиэхиньикэлээхпит, эбии тырахтарыыс, суоппар, тыа баһаарынньыктарын үлэҕэ ылбыттара. Ол түмүгэр ойуурга уот турбут кэмигэр иэнин улаатыннарбакка, умулларыы үлэлэрэ бардылар.

Былааннаах үлэ сылын ахсын элбээн иһэр, кыайа-хото үлэлиир­гэ бары усулуобуйа тэриллэр, онон биһиги тэрилтэбит өссө да кэҥии, сайда туруоҕа. Бииргэ үлэлиир тэрилтэм салайааччыларыгар уонна үлэһиттэрбэр таһаарыылаах үлэни, чэгиэн-чэбдик туругу баҕарабын.

Петр Винокуров,

“Якутлесресурс” тэрилтэ Мэҥэ Хаҥаластааҕы салаатын

ойууру харыстыыр уонна көмүскүүр 2 категориялаах инженерэ,

“СӨ ойуур харыстабылын үтүөлээх үлэһитэ”, 38 сыл ойуур хаһаайыстыбатыгар үлэлиир.

Хаартыскаҕа: Нам улууһунааҕы филиал үлэһиттэрэ