«Якутлесресурс» тэрилтэ баһаар сезонун үлэтин бэлэмнээх көрсөр
![](https://sakha-sire.ru/wp-content/uploads/2024/06/yakutlesresurs-hanalastaagy-filialyn-ylehittere-bahaar-sezonugar-belemner-1060x596.jpg)
Самаан сайыммыт салаллан кэллэ. Сотору иһийэн турбут айылҕа күөх дуйга куустарыа, көтөр-сүүрэр саҥатынан туолуо турдаҕа. Ол эрээри бу кэрэ айылҕабыт сайын аайы айылҕа да, икки атахтаах да содулуттан күл-көмөр буолар, өлөр-кэхтэр. Ону кытары айылҕа харыстабылын, ойуур баһаарын утары үлэлээччилэр түүннэри-күннэри үлэлэрэ саҕаланар.
Күүстээх үлэ саҕаланна
«Якутлесресурс» судаарыстыбаннай автономнай тэрилтэ — судаарыстыбаннай сорудах чэрчитинэн өрөспүүбүлүкэ сиригэр-уотугар ойууру саҥардар, харыстыыр, араҥаччылыыр аналлаах. Тэрилтэ састаабыгар өрөспүүбүлүкэ 21 оройуонугар уонна Дьокуускай куоракка баар 22 салаа киирэллэр.
«Якутлесресурс» 100% бэлэм
Баһаар сезона саҕаланан, ыам ыйын 7 күнүгэр Өрөспүүбүлүкэ сиригэр-уотугар баһаартан сэрэхтээх буолуу биллэриллэрин туһунан уураахха бырабыыталыстыба бэрэссэдээтэлин бастакы солбуйааччы Дмитрий Садовников илии баттаабыта. Олохтоох бэйэни салайыныы уорганнара ойуур баһаарыттан тахсар ыксаллаах балаһыанньаны сэрэтэргэ уонна туоратарга хайысхаланар тэрээһиннэри толорууну хааччыйыахтаахтар. Быйылгы сезоҥҥа «Якутлесресурс» тэрилтэ 100 бырыһыан бэлэмин тактическай көрүү үөрэхтэрин кэмигэр бигэргэппиттэрэ.
Билиҥҥи туругунан, 564 баһаары утары охсуһааччы уонна 262 анал тиэхиньикэ баар. Өрөспүүбүлүкэ улуустарыгар баар бары филиаллара нэһилиэнньэҕэ сэрэтэр үлэни ыыталлар.
Ыам ыйа саҥа бүтэн эрэр даҕаны, номнуо ойуур баһаардара тахсан, ону умуруорар үлэлэр баран эрэллэр. «Якутлесресурс» тэрилтэ ыам ыйыгар кураанах этиҥнэр буолбаттар, онон дьон дьалаҕайыттан, сыыһа туттунуутуттан эрэ баһаар турарын этэр. Онон, ойуурга уоту ыыппыт киһи кытаанах миэрэҕэ тардылларын туһунан нэһилиэнньэҕэ санатар. Санатан эттэххэ, баһаар турарыгар буруйдаах киһи ойуур баһаарын умулларыыны, ойуур пуондатын ороскуотун бүтүннүү толуйар уонна холуобунай дьыала тэриллэр, суут нөҥүө ону ирдээн ылыллар.
![](https://sakha-sire.ru/wp-content/uploads/2024/06/yakutlesresurs-ylehittere-nam-uluuhugar-halaantan-emsegeleebitterge-kemeleheller-1-e1717204399779.jpg)
Айылҕабытын харыстыаххайыҥ!
Саха Өрөспүүбүлүкэтин айылҕа харыстабылын миниистирэ Евгений Перфильев көҕүлээһининэн, ыам ыйын 17 күнүгэр Бүлүүлүүр суол 17 км «Ыраас ойуур» диэн экологическай аахсыйаны ыытта. Бүлүүлүүр суол кытыытын бөҕүн-саҕын ыраастаатылар, өр кэмнэргэ быраҕыллан сыппыт массыына хаарбах куузабын сыбаалкаҕа тиэйдилэр. “Якутлесресурс” тэрилтэ Дьокуускайдааҕы филиалын дириэктэрэ Александр Подрясов тэрээһин туһунан маннык кэпсиир:
«Миниистир ыҥырыытын өйөөн, биһиги тэрилтэбит генеральнай дириэктэрин бастакы солбуйааччы Спартак Иванов салалтатынан Бүлүүлүүр суол кытыытын ыраастааһыҥҥа үлэлээтибит. Уруккуттан сыппыт, хаарбах 2 массыына куузабын уонна биир тимир оһоҕу эрбээн сыбаалкаҕа тиэйдибит. Сыл аайы, үгэс курдук, баһаар сезонун иннинэ ыраастааһын үлэтин ыытабыт. Саха сирин олохтоохторун баһаартан сэрэхтээх буолалларыгар, бэйэбит сирбитин-уоппутун, айылҕабытын харыстыаххайыҥ, ыраастык тутуоххайыҥ диэн ыҥырабыт!»
Үгэс буолбут ыраастааһын үлэтэ
«Якутлесресурс» ГАУ уонна «Авиалесоохрана» ГУУ Дьокуускай куорат пааркатын Ойууру көрөөччү искибиэригэр үгэс буолбут субуотунньугу ыытта. Бу искибиэр 2015 сыллаахха балаҕан ыйын 16 күнүгэр киин куорат Сынньалаҥ пааркатыгар Ойуур үлэһиттэрин күнүгэр ананан аһыллыбыта. Онно Сэбиэскэй Сойуус Дьоруойа — Бүлүү улууһун ойуурун хаһаайыстыбатын үлэһитигэр Николай Саввич Степановка аналлаах өйдөбүнньүк турар.
Саха сирин тыатын, ойуурун харыстыырга олохторун анаабыт дьону кэриэстиир, кинилэр тустарынан ахтан-санаан ааһыы хас биирдии киһиэхэ холобур буолуохтаах! Ол сиэринэн үтүө үгэһи салҕаан Ойууру көрөөччү искибиэригэр сыл аайы ыраастыыр үлэ ыытыллар.
![](https://sakha-sire.ru/wp-content/uploads/2024/06/yakutlesresurs-terilte-ylehittere-bylyy-suolun-kytyytyn-yraastaatylar-e1717204420788.jpg)
Халаан содулун туоратыыга
Быйыл сааскы халаан улахан содуллаах буолла, улахан хоромньуну таһаарда, Өлүөхүмэ, Ньурба, Нам улуустарын нэһилиэктэрин ылан ааста. Бу күннэргэ өрөспүүбүлүкэ үгүс тэрилтэлэрэ халаан уутуттан эмсэҕэлээбит нэһилиэктэргэ чөлүгэр түһэриигэ туох баар күүстэрин ууран көмөлөһө сылдьаллар.
«Якутлесресурс» тэрилтэ үлэһиттэрэ тута туттуллар малы-салы хомуйан, гуманитарнай көмөнү Нам улууһугар тириэртилэр. Намнааҕы филиал уонна ойуур хаһаайыстыбатын үлэһиттэрэ халаан содулун туоратыыга эмиэ күүс-көмө буолаллар. Ол курдук, филиал үлэһиттэрэ Хатырык нэһилиэгэр ууга барбыт сүөһүнү-сылгыны харайыыга үлэлэһэллэр. Ону сэргэ 2‑с Хомустаах нэһилиэгэр гуманитарнай көмө тиийэригэр мал-сал тиэйиитигэр үлэлээтилэр.
Дьокуускай куораттан чөлүгэр түһэрии үлэтигэр көмөҕө 2 погрузчик тыраахтары таһааран үлэлэттилэр. «Якутлесресурс» үлэһиттэрэ: «Бу курдук, айылҕа оҥорбут алдьархайын туоратыыга бары күргүөмүнэн түһүннэхпитинэ, бэйэ-бэйэбитигэр көмөлөстөхпүтүнэ, туох барыта кыайтарыа, чөлүгэр түһүө. Биһиги эрэнэбит, уопсай күүһүнэн биһиги айылҕа оҥорбут содулун туоратыахпыт», — диэн санааларын үллэһиннилэр.
Сообщить об опечатке
Текст, который будет отправлен нашим редакторам: