«Якутуголь» оҥорон таһаарар былаһааккатыгар тахсыбыт саахалынан бэрэбиэркэ ыытылынна

Өрөспүүбүлүкэ борокуруора Сергей Дябкин сорудаҕынан Нерюнгри куорат борокуратуурата «Якутуголь» ХК АУ «Нерюнгринская» байытар фабрикатын бэлэм бородууксуйатын ыскылаатыгар тахсыбыт саахал чахчытынан бэрэбиэркэни ыытта.

Силиэстийэнэн быһаарыллыбытынан, массыына гидроподъемнигын стрелата эмискэ бэйэтэ түргэнник түспүтүн түмүгэр 2 киһи эчэйбит, онтон биирдэстэрэ кэлин тыына быстыбыт.

Эмсэҕэлээччилэр «Якутуголь» ХК АУ-ну кытта чох хампаанньатыгар үлэһиттэри биэрэр өҥө туһунан дуогабар түһэрсибит атын тэрилтэ үлэһиттэрэ эбиттэр. Роструд, Ростехнадзор, Роспотребнадзор, ЫБММ территориальнай уорганнарын исписэлиистэрин кытыннаран, саахал тахсыбыт оҥорон таһаарар былаһааккатыгар  «Якутуголь» ХК АУ үлэтин-хамнаһын бэрэбиэркэлээһин түмүгүнэн үлэ харыстабылын, баһаартан уонна бырамыысыланнас куттала суох буолуутун быраабылалара кэһиллибиттэрэ быһаарылынна.

Борокуратуура административнай дьыалалары көбүттэ. Бу чахчынан РФн Холуобунай кодексын 216-с ыстатыйатын 2-с чааһынан (тутуу эбэтэр атын үлэлэри ыытыыга куттал суох буолуутун быраабылаларын кэһии) көбүтүллүбүт холуобунай дьыала силиэстийэлээһинэ  борокуратуура хонтуруолугар турар.