«Якутяночка» уһуйаан кэллэктиибэ: «Сүрүн сорукпут – уһуйааммыт тас көстүүтүн тупсарыы»

Ойор-тэбэр оҕо саас уйата, кырачаан киһи үүнэр-сайдар дьиэтэ – уһуйаан. Мин сылдьар 9-с нүөмэрдээх «Якутяночка» уһуйааным Дьокуускай куорат киинигэр турар. Манна мин үс сааспар аан бастаан кэлбитим, үс мэндиэмэннээх улахан уораҕай, эйэҕэс иитээччилэр, минньигэс астаах асчыттар, сайаҕас үлэһиттэр, араас дьарыктар баалларын сонурҕуу көрбүтүм. Сыыйа барыларын кытта билсэн, алтыһан, билигин уһуйааммытыгар бары биир улахан дьиэ курдукпут.

Биһиги «Якутяночкабыт» 2023 сылга 35 сааһын туолар өрөгөйдөөх  үбүлүөйүгэр бэлэмнэнэр. Уһуйааммыт кырачааннар тыллара-өстөрө тупсарын, оҕолор саҥалара-иҥэлэрэ сайдарын туһугар ураты болҕомтону уурар. Түргэн тэтимнээх олоҕу кытта тэҥҥэ хардыылаан, араас саҥа соруктары, сыаллары толорор, олоххо киллэрэр. Педкэллэктиип 30 исписэлиис баар, онтон 83%-а — үрдүк категориялаах.

2015 сыллаахха В.В.Воскович аатынан РИВ тьюторскай киин статуһун ылбыта элбэҕи кэпсиир. 2020 сылтан үөрэх салалтатын бирикээһинэн СИО (Сетевое инновационное объединение) буолан сүөм үрдээбитэ, эбии былаанар оҥоһуллубуттара, оҕону оонньуу көмөтүнэн олох киэҥ оҥкулун билиһиннэрэр бырайыактар баар буолбуттара. Ону сэргэ, аныгы цифровой эйгэ балысханнык сайда турар кэмигэр кырачааннар логическай толкуйдарын, дьоҕурдарын сайыннарары күүһүрдэр ньыманан күүскэ үлэлиир. Бу күһүҥҥэттэн уһуйааммыт федеральнай экспериментальнай былаһаакка статуһун ылан, «Культурный код» диэн улахан бырайыакка кыттыста. Мин дьиэ кэргэним манна эмиэ бэйэтин кылаатын киллэрдэ, биэс көлүөнэ тухары биһиги аймахха кэрэ эйгэтигэр оҕону уһуйуу ситимин сиһилээтибит.

Үбүлүөйдээх сылбытыгар былаанныыр үлэ билиҥҥэттэн бара турар, сүрүн сорукпут – уһуйааммыт тас көстүүтүн тупсарыы. Уһуйаан тас көстүүтүнэн оҕо болҕомтотун тардар, кэрэҕэ сирдиир, ыраахтан угуйар, кырачааннары билии-көрүү эйгэтигэр сирдиир буолуохтаах дии саныыбыт. Кырдьыгы эттэххэ, биһиэхэ ол эрэ тиийбэт. Уһуйааммыт тас көстүүтүн (фасадын) саҥардыы, аныгы олоххо сөп түбэһиннэрэн чочуйуу наада. Бу кыһалҕаны туоратар сыалтан  «ППМИ-2023» бырайыакка аан бастакыбытын төрөппүттэр уонна уһуйааммыт үлэһиттэрин көҕүлээһининэн кытта сылдьабыт. Ыра оҥостубут баҕа санаабыт олоххо киирэрэ буоллар, уһуйааммыт тас көстүүтэ тупсар күнэ үүннэр бары үөрүөхпут уонна дьоллонуохпут этэ. Саҥа ситиһии  сиэттиһиэ, өссө үрдүккэ кынаттаныа этибит.

«Дьол хараҕа суох» диэн мээнэҕэ эппэтэх буолуохтаахтар, ол курдук оҕолор, иитээччилэрбит, төрөппүттэрбит бары эрэнэбит.

Лилия Шарина-Чөмчүүк, «Дьэдьэннэр» бэлэмнэнии бөлөх иитиллээччилэрэ, иитээччитэ, төрөппүттэрэ.