Ыал ийэтэ уолун хоккей клюшкатынан сынньыбытын иһин сууттанна

Дьокуускайдааҕы куорат суута Дьокуускай куорат олохтооҕор РФ Холуобунай кодексатын 112-с уонна 117-с ыстатыйаларынан (доруобуйаҕа орто ыар содулу соруйан оҥоруу, эрэйдээһин) көрүллүбүт буруйу оҥорууга буруйданар дьахтарга холуобунай дьыалатын көрдө. Бу туһунан Саха сирин сууттарын холбоһуктаах пресс-сулууспата иһитиннэрэр.

Суукка быһаарыллыбытынан, 2025 сыл тохсунньутуттан кулун тутар ыйыгар диэри дьахтар 12 саастаах уолун майгытын-сигилитин сөбүлээбэккэ – истибэтин, мэниктиирин, оонньуурун-көрүлүүрүн уонна кыра алҕастары оҥорорун иһин, итини таһынан дьиэҕэ үлэтин күннүгэр суруйбатах эбэтэр таһырдьаттан хойутаан кэлбит түгэнигэр накаастыыр баҕаттан оҕотун тиһигин быспакка илиитинэн, ону тэҥэ хоккей клюшкатынан кырбаабыт.

Бу сыл муус устар ыйыгар сууттанааччы уола дьиэтигэр хойутаан кэлбитин иһин илиитинэн, атаҕынан, ону тэҥэ хоккей клюшкатынан оҕотун төбөтүн, этин-сиинин, илиитин-атаҕын араастаан элбэхтэ охсуталаабыт. Ол түмүгэр уол хаана туран, оһоллонон, уҥа илиитин уҥуоҕа тостубут. Билиҥҥи туругунан, ийэ уолугар сыһыаннаан төрөппүт бырааба хааччахтаммыт, эчэйбит  оҕону оҕо киинигэр киллэрбиттэр. Суут мунньаҕар сууттанааччы буруйун сорҕотун билиммит. Суут бириигэбэринэн дьахтар РФ ХК 117-с ыстатыйатын 2-с чааһын «г» пуунунан уонна 112-с ыстатыйатын 2-с чааһын «в, з» пууннарынан көрүллүбүт буруйдары оҥорбутунан буруйдааҕынан билинилиннэ уонна 4 сыл 6 ый болдьоххо көҥүлэ быһыллан, 4 сыл устата тургутар болдьохтоох усулуобунай накаастабыл ананна. Бириигэбэр сокуоннай күүһүгэр киирэ илик.