Ыал ыта улуйан утуппат буоллаҕына тугу гынабыт?

Сарсыарда эрдэ уһугуннарар, күнү быһа улуйар, киэһэ утуйар уугун көтүтэр. Бу эһиги тус көмөлөһөөччүгүт буолбатах, таһынааҕы ыалгыт ыта түүннэри-күнүстэри үрэр буоллаҕына, тугу гыныахха сөбүн «объясняем.рф» портал быһаарар.

Ыт хаһаайына дьиэ харабыла атын дьоҥҥо мэһэйдээбэтин ситиһиэхтээх. Хайдах дьаһаныахха сөбүн уонна сокуон тугу этэрин билиһиннэрэбит.

Сокуон тугу этэрий?

Дьиэ олохтоохторун сынньалаҥын СанПиН нуормалара көмүскүүллэр. Ол быһыытынан, түүн  тыас-уус кээмэйэ 45 децибелтэн (дБ), оттон күнүс 55 децибелтэн тахсыа суохтаах. Бу нуормалары таһынан тахсар уонна ыаллары аймааһын кэһии быһыытынан ааҕыллар. Тэҥнээн көрүҥ — намыын, холку кэпсэтии 50 дБ кэриҥэ, оттон хаһыы 90 дБ тиийэр.

Бу таһынан, хас биирдии эрэгийиэҥҥэ чуумпуну тутуһуу сокуона үлэлиэн сөп. Онно эмиэ күн-дьыл ханнык кэмигэр айдаарар бобуллар быһаарыллар.

Хайдах быһаарабыт?

Ыт хаһаайынын кытта кэпсэтиҥ. Туох эрэйдиирин туһунан ытыктабыллаахтык, киһилии быһаарсыҥ. Үксүгэр хаһаайыттар дьиэлэригэр суохтарына ыттара улуйарын билбэттэр. Дьону куттаамаҥ, ходуоһулаамаҥ, ол түгэҥҥэ эһигини суукка биэриэхтэрин сөп.

ТСЖ, УК хампаанньаларын биллэриҥ. Хампаанньа үлэһиттэрэ ыалгытын кытта кэпсэтиэхтэрэ, ыт үрэрин, олохтоохтор сынньалаҥнарын кэһэрин быһаарыахтара уонна миэрэ ылалларыгар модьуйуохтара.

Кэпсэтии көмөлөспөтөҕүнэ, учаастактааҕы боломуочунайга эбэтэр полицияҕа этиҥ. Суругунан үҥсүү суруйуҥ, дакаастабыллары сыһыарыҥ: күнүн-дьылын, бириэмэтин ыйан туран оҥоһуллубут аудио- эбэтэр видео-устуулары, онно ыт үрэрэ чуолкайдык иһиллэр буолуохтаах. Иниспиэктэр сэрэтиэн эбэтэр административнай кэһии туһунан боротокуол оҥоруон сөп.

Суукка үҥсүү киллэриҥ. Бу – ыалларгыт кыһалҕаны быһаарсыан баҕарбат түгэннэригэр туттуллар тиһэх миэрэ. Ол иннинэ дакаастабыллары бэлэмнээҥ:  видео- уонна аудиоматырыйааллары; учаастактааҕы боломуочунай эһиги үҥсүүгүтүгэр суругунан хоруйдарын; тыас-уус нуорматтан тахсарын туһунан Роспотребнадзор эбэтэр чааһынай лаборатория түмүк докумуонун; ыт үрэригэр эмиэ мэһэйдэтэр атын ыалларгыт туоһулааһыннарын. Суут дьиэ кыылын иитии быраабылатын эбэтэр олохтоох чуумпуну тутуһуу сокуонун кэспитин иһин ыт хаһаайыныгар ыстараап анаан таһаарыан сөп.