Ыалдьыт санаата: «Наһаа үчүгэйдик көрүстүлэр»

Олоҥхо ыһыаҕын иккис күнэ саҕаланна. Ыһыах ыалдьыттара санааларын үллэстэллэр.

Кэбээйиттэн кэлэ сылдьар, норуот маастара Елизавета Константиновна Софронеева иккис күнүн икки күрэскэ кыттар. Бэҕэһээ 18-с үйэтээҕи саха төрүт таҥаһын, бүгүн аныгы истииллээх тикпит таҥаһын көрдөрбүттэр.

— 2026 сылга Олоҥхо ыһыаҕа биһиэхэ, Кэбээйигэ буолуоҕа. Онон хайаан да барыахтаахпын, хайдах бэлэмнэмнэнэллэрин көрүөхтээхпин диэн оҥостон кэллим. Кэбээйиттэн 38 буолан кэллибит. Тэрээһинэ бэртээхэй эбит. Бастаан Эмискэ, онтон нэһилиэктэринэн үллэстэн, Абаҕалар көрсүбүттэрэ, аһаппыттара. Ыһыах аһыллыытыгар хас биирдии ыалдьыты үтэһэлээх этинэн, быырпаҕынан наһаа үчүгэйдик көрүстүлэр.
Аммаҕа бастакы сырыым буолан, үөрэн-көтөн, дуоһуйан сылдьабын, — диэн Елизавета Константиновна Софронеева санаатын үллэһиннэ.