Ыам ыйын 1 күнүттэн Таилаҥҥа киирэргэ анал онлайн-форманы толороруҥ ирдэнэр

Таиланд полициятын иммиграционнай бюрота иһитиннэрбитинэн, тус бэйэ дааннайдара ыытыллыбыттарын кэннэ, королевство иммиграционнай уорганнара  электроннай почтанан сурук ыытыахтара.

Ону дойдуга киирэргэр көрдөрүөхтээххин, диэн ТАСС суруйар.

«Таиланд иммиграционнай бюрота айанньыттар дойдуга киирэллэрин чэпчэтэр сыалтан Таилаҥҥа киирии цифровой каартатын (TDAC) киллэрдэ. Таиланд Королевствотыгар кэлэр омук дьоно бары  киириэхтэрин иннинэ TDAC-ы онлайн толоруохтаахтар. Маны тутуһуу 2025 сыл ыам ыйын 1 күнүттэн ирдэниэҕэ. TDAC суох буоллаҕына, эн киириигин иммиграционнай сулууспа үлэһиттэрэ көрүөхтэрэ суоҕа,» — диэн иммиграционнай бюроҕа эппиттэр.

TDAC онлайн-форматын tdac.immigration.go.th саайтка айанныаҥ үс күн иннинэ онлайн толоруоххун сөп. Онуоха пааспаргын эбэтэр айанныыр докумуоҥҥун, толору ааккын, төрөөбүт күҥҥүн, гражданствоҕын, ону тэҥэ айаныҥ маршрутун, ол иһигэр рейсиҥ, Таилаҥҥа тиийэр күҥҥүн уонна түһэр сириҥ туһунан информацияны бэлэмниэххин наада. Тус дааннайдаргыт ыйыллыбыттарын кэннэ, Таиланд иммиграционнай уорганнара электроннай почтаҕар сурук ыытыахтара, ону дойдуга киирэргэр көрдөрөҕүн.