Ыам ыйын 18 күнэ – Саха сиригэр Ньургуһун күнэ
![](https://sakha-sire.ru/wp-content/uploads/2023/04/972d3347-cc28-45e2-abf4-30be591f026d-900x596.jpg)
Бүгүн Саха сиригэр тыйыс тымныылаах кыһын кэнниттэн, саас кэлбитин биллэрэн, тоҥ буору тобулан тахсар ньургуһуммут күнүн бэлиэтиибит. Ньургуһун кэрэтэ ырыаҕа ылламмыта, хоһооҥҥо хоһуллубута элбэх, ол курдук саха киһитин айар кутун кылын таарыйар ураты алыптаах.
Ньургуһун күнэ Саха сиригэр 2004 сыллаахтан бэлиэтэнэр. Бу бэлиэ күн суруналыыс Иван Ушницкай көҕүлээһининэн олохтоммута. Дьиҥэ, официальнай ылыныллыбыт күн буолбатах эрээри, тоҥ буору тобулан, күн диэки тардыһан тахсыбыт маҥнайгы сибэккини кэрэхсээн, уруйдаан норуот бэйэтэ ылынан бэлиэтиир.
Биһиэхэ ньургуһун сэттэ көрүҥэ үүнэр, бары тус-туспа дьүһүннээхтэр. Ол курдук өрөспүүбүлүкэ киин өттүгэр, үгүстүк саһархайдыҥы маҥан ньургуһун үүнэр. Бүлүү бөлөх эҥэр күөхтүҥү, күөхтүҥү-хара саарыл, кытархайдыҥы дьүһүннээхтэр үгүстүк көстөллөр. Оттон хоту хараҥа күөхтүҥү үүнэр. Саха сирин соҕуруулуу-арҕаа өттүгэр, Өлүөхүмэ, Ленскэй диэки чэрэниилэ өҥнөөх, күөхтүҥү саарыл дьүһүннээх ньургуһуннар үүнэллэр, ону сэргэ хас даҕаны эминньэхтээх ураты ньургуһуннары эмиэ көрүөххэ сөп.
Сообщить об опечатке
Текст, который будет отправлен нашим редакторам: