Ыам ыйын 27 күнэ – Бүтүн Арассыыйатааҕы Бибилэтиэкэ күнэ

Бүгүн — ыам ыйын 27 күнэ — Арассыыйаҕа Бибилэтиэкэ күнэ. Бэрэсидьиэн Борис Ельцин уураҕынан 1995 сыллаахтан бэлиэтэнэр буолбута.

Бибилэтиэкэ күнүгэр Иван Крафт аатынан Ил Дархан бириэмийэтин лауреаттара биллиэхтэрэ.  Наҕараадалары СӨ Национальнай бибилэтиэкэ устуоруйаҕа саалатыгар үөрүүлээхтик туттарыахтара. Бу бириэмийэ сыл аайы бастыҥ бибилэтиэкэрдэргэ уонна бибилэтиэкэ үлэһиттэригэр, меценаттарга уонна попечителлэргэ ананар.

Саха сиригэр барыта 501 бибилэтиэкэ үлэлиир, олортон 3 судаарыстыбаннай, 498 муниципальнай, ол иһигэр тыа сиригэр 407 муниципальнай. Бу бибилэтиэкэлэр нэһилиэнньэ 51 бырыһыанын хабаллар.

Ону сэргэ бибилэтиэкэ дьыалатын эдэр исписэлиистэригэр САССР култууратын үтүөлээх үлэһитэ Татьяна Андреевна Жараева аатынан бириэмийэни туттарыахтара. Национальнай бибилэтиэкэҕэ 11:00 чаастан өрөспүүбүлүкэтээҕи сетевой аахсыйа саҕаланыаҕа. Таптыыр кинигэтин Хатас орто оскуолатын 7 «в» кылааһын үөрэнээччитэ Дария Реева ааҕыаҕа.  «Святое место — книжная страна», «Самая-самая…» диэн кинигэ быыстапкаларын билиһиннэриэхтэрэ.