Ыам ыйынааҕы «Чолбон»: Аҕа дойду Улуу сэриититтэн байыаннай дьайыыга диэри уонна «Ааттамматах кэпсээн»

«Чолбон» сурунаал ыам ыйынааҕы нүөмэригэр  Улуу Кыайыы 80 сылыгар  уонна фронтовик суруйааччыларга аналлаах айымньылары, суруйуулары аах:

— Бас тылга Гаврил Андросов «Сахалар – Аҕа дойду көмүскэлигэр» бэлиэтээһинэ;

— «Хоту дойду хонноҕуттан…» герой үрдүк аатын сүкпүт саха буойуннарыгар анабыл хоһооннор;

— саха норуотун суруйааччыта Куорсуннаах  Аҕа дойду Улуу сэриитигэр ууну-уоту  ортотунан ааспыт саха эписиэрин туһунан «Биһиги тыыннаахпыт» романыттан быһа тардыы;

— Сэбиэскэй Сойуус Геройа Николай Кондаков дьон хара хаанын хамсаппыт фашизм, сэрии ыар көстүүлэрин туһунан «Одоҥ-додоҥ өйдөөһүннэр», «Өстөөх уораҕайыгар» уочаркалара;

— бойобуой эписиэр, поэт Макар Хара туһунан Утум Захаров «Макар Хара: ыстыыкка бөрүөбүн солбуйан…» ыстатыйата;

— «Биллиилээх суруйааччылар биографиялара» рубрикаҕа Данил Макеев аҕа көлүөнэ тапталлаах  прозаигын туһунан  «Исай Никифоров. Гитлер урусхалламмыт кабинетын көрбүт саха суруйааччыта» ыстатыйата;

— хоту дойду суруйааччыта Николай Абыйчанин төрөөбүтэ 100 сылынан «Көкөтүүн уонна Маайыс»  диэн киһилии сыһыан үтүө холобурун туһунан кэпсээнэ;

— прозаик  Сардаана «Ааттамматах кэпсээнин» аах уонна сүрүн геройу таай;

— поэт Хабырыыс Ондороос «Субу сүүспүн ууруур таммах өлбөт мэҥэ уу диэн ааттаах…» диэн олох, таптал туһунан  саҥа хоһооннорун бөлөҕө;

— Краснодар суруйааччыта Светлана Макарова-Гриценко байыаннай дьайыыга сылдьар саха буойунун  туһунан «Баай» кэпсээнэ Лилия Иванова тылбааһыгар;

— ХИФУ усутудьуона Констанция Яковлева байыаннай дьайыыга сырдык тыынын толук уурбут   эдэр поэт Василий Рожин поэзиятын туһунан «Уйан кут уонна уот сүрэх» ырытыыта;

— «Оҕоҕун кытта аах» рубрикаҕа Аҕа дойду Улуу сэриитин хорсун пулеметчига Петр Тобуруокап «Ийэ дойду таптала», «Ытанньах герой буолбат» диэн  хоһоонноро.

«Күн – сири, «Чолбон» — саханы сырдатар!»

Алгыһы кытта «Чолбон» сурунаал